نگراں وزیراعظم نے کہا ہے کہ پی ٹی آئی کا آئی ایم ایف کو خط لکھنا غیرذمہ دارانہ عمل ہے، اس وقت آئی ایم ایف کے ساتھ مثبت بات چیت جاری ہے۔
تفصیلات کے مطابق ایک انٹرویو کے دوران نگراں وزیراعظم انوارالحق کاکڑ کا کہنا تھا کہ امید ہے آئی ایم ایف کے ساتھ 6 ارب ڈالرز کی بات چیت ہو گی۔ انتخابی معاملات کا فورم آئی ایم ایف نہیں ہے۔ بیرونی قوتوں کے سامنے سرنڈر نہ کرنا ان کا سیاسی بیانیہ ہے۔
نگراں وزیراعظم نے کہا کہ انہی سے جڑے اداروں کی یہ مدد بھی چاہتے ہیں۔ پی ٹی آئی کے آئی ایم ایف کو لکھے گئے خط سے کوئی فرق نہیں پڑیگا۔
پی ٹی آئی کو خط لکھنے کی سیاسی قیمت ادا کرنی پڑے گی، عدالتوں کی عزت اور ان کے سامنے سرنڈر کرنا چاہیے۔ لاپتہ افراد کے اعداد و شمارغلط اور زیادہ بتائے جاتے ہیں۔ ایک فہرست کے مطابق 68 لاپتہ افراد میں سے 64 ٹریس ہوگئے ہیں۔
وزیراعظم نے کہا کہ دوسری فہرست کے مطابق 26 میں سے 20 لوگ ٹریس ہوچکے ہیں۔ اطلاع ہے کہ 2 افراد نے داعش کو جوائن کرلیا ہے۔ جج نے لاپتہ افراد کے حوالے سے نگراں حکومت کی کاوشوں کو سراہا۔
انوارالحق کاکڑ نے کہا کہ پاکستانی شہری نان اسٹیٹ ایکٹرز کے طور پر یہاں سے شام تک لڑتے پائے گئے۔ جو لڑتے ہوئے پائے یا مارے گئے ان کا ڈیٹا موجود نہیں۔ بہت سارے لوگ افغان کیمپوں میں بھی رہے ہیں۔
انھوں نے کہا کہ ہم نے ایران کو جواب دیا تھا اس میں جو لوگ مارے گئے وہ پاکستانی تھے۔ میڈیا پر بیانیہ بنانے سے مسئلہ حل نہیں ہوگا۔
نگراں وزیراعظم نے کہا کہ لاپتہ افراد کے لواحقین سے بات چیت کی کوشش کی گئی ہے۔ صوبے اور وفاق کی سطح پر کمیشن بھی بنائے گئے ہیں۔
