اسلام آباد: وزیر اطلاعات مریم اورنگزیب نے نو منتخب وزیر اعلیٰ پنجاب پرویز الہٰی کی تقریب حلف برداری پی ٹی وی سے نشر نہیں ہونے دی۔
تفصیلات کے مطابق وزیر اطلاعات مریم اورنگزیب نے پرویز الہٰی کی تقریب حلف برداری کو نشر کرنے سے روک دیا، عوام کے ٹیکسوں سے چلنے والے سرکاری ٹی وی پر صحافتی بد دیانتی کی گئی۔
رپورٹس کے مطابق مریم اورنگزیب نے ملک کے سب سے بڑے صوبے کے نو منتخب وزیر اعلیٰ کی ایوان صدر میں منعقدہ سرکاری تقریب براہ راست نشر نہیں ہونے دی۔
پی ٹی وی نے تقریب اسکرین کے صرف ایک حصے پر برائے نام چلائی، اور عوام کو تقریب حلف برداری براہ راست دیکھنے سے محروم رکھا گیا۔
چوہدری پرویزالہیٰ نے وزیراعلیٰ پنجاب کا حلف اٹھالیا
واضح رہے کہ سرکاری ٹی وی وفاقی وزیر اطلاعات مریم اورنگزیب کے ماتحت ہے۔ سابق وزیر اطلاعات فواد چوہدری نے اس پر تبصرہ کرتے ہوئے کہا کہ مریم اورنگزیب کے کہنے پر پرویز الہٰی کی تقریب حلف برداری نہیں دکھائی گئی۔
فواد چوہدری نے تنبیہہ کی کہ میں بتا رہا ہوں کہ پی ٹی وی پر جو لوگ اس وقت عہدوں پر ہیں اگلے مہینے نہیں ہوں گے، اگر ان لوگوں کو بھی جیل میں جانا ہے تو ایسا کرتے رہیں، مریم اورنگزیب خود جیل جانے والی ہیں۔
گزشتہ روز نو منتخب وزیر اعلیٰ پنجاب چودھری پرویزالہٰی نے حلف اٹھا لیا، صدر عارف علوی نے ان سے ایوان صدر اسلام آباد میں حلف لیا، پرویز الہٰی سپریم کورٹ کے حکم پر وزیر اعلیٰ پنجاب کا حلف اٹھانے جب گورنر ہاؤس پہنچے تو اس کے گیٹ بند ملے، اور پرویز الہٰی کو داخلے کی اجازت نہیں ملی، گورنر پنجاب بلیغ الرحمان نے ان سے حلف لینے سے انکار کر دیا تھا۔
