The news is by your side.

Advertisement

خانیوال ملتان موٹروے شدید دھند کےباعث بند کردی گئی، بارش کا امکان

لاہور : خانیوال ملتان موٹروے شدید دھند کے باعث بند کردی گئی، محکمہ موسمیات کا کہنا ہے کہ ہفتے کو اسلام آباد میں گرج چمک کے ساتھ بارش ہوسکتی ہے جبکہ پنجاب کے مختلف شہروں میں دھند مزید بڑھنے کا امکان ہے۔

تفصیلات کے مطابق صوبہ پنجاب کے مختلف شہر شدید دھند کی لپیٹ میں ہیں اور حد نگاہ کم ہونے کے باعث خانیوال ملتان موٹروے کو گاڑیوں کی آمدورفت کے لیے بند کردیا گیا ہے۔

اس حوالے سے ترجمان موٹروے پولیس کے مطابق قومی شاہراہ پر چیچہ وطنی، میاں چنوں، خانیوال میں دھند شدید نوعیت کی ہے۔

اس کے علاوہ ملتان، بستی ملوک، لودھراں، بہاولپور میں بھی دھند کا راج برقرار ہے۔ قومی شاہراہ پرحد نگاہ صفرسے200میٹرتک ہے، حد نگاہ کم ہونے کے باعث موٹروے گاڑیوں کی آمدورفت کے لیے بند کردی گئی ہے۔

ترجمان نے مسافروں کو ہدایت کی ہے کہ شہری گاڑیوں میں فوگ لائٹس کا استعمال کریں اور دھند کے دوران غیر ضروری سفر سے گریز کریں اور موٹروے پرسفر سے قبل موٹروے ایپلی کیشن ایف ایم 95 ریڈیو اور ہیلپ لائن 130 سے مدد لیں۔

دوسری جانب محکمہ موسمیات نے آئندہ 24 گھنٹوں کے دوران اسلام آباد میں مطلع جزوی ابر آلود رہنے اور گرج چمک کے ساتھ بارش کے امکان کی پیشگوئی کی ہے جبکہ ملک کے بالائی علاقوں میں بھی رات کے اوقات میں شدید سردی اور صبح ہلکی برف باری کا امکان ظاہر کیا ہے۔

Comments

یہ بھی پڑھیں