اسلام آباد: نامزد چیف جسٹس آف پاکستان قاضی فائز عیسیٰ کی تقریب حلف برداری 17 ستمبر کو ایوان صدر میں ہوگی جس کیلیے تیاریاں شروع کر دی گئیں۔
صدر مملکت عارف علوی نامزد چیف جسٹس قاضی فائز عیسیٰ سے حلف لیں گے۔ تقریب میں نگراں وزیر اعظم انوار الحق کاکڑ اور وفاقی وزرا سمیت مسلح افواج کے سربراہاں بھی شریک ہوں گے۔
حلف برداری کی تقریب کیلیے دعوت نامے ارسال کر دیے گئے۔
ذرائع کے مطابق موجودہ چیف جسٹس عمر عطا بندیال چیف جسٹس ہاؤس خالی کرنے کے بعد ریٹائرڈ ججز کیلیے مختص گھر منتقل ہوگئے۔ وہ 16 ستمبر کو عہدے سے ریٹائرڈ ہو رہے ہیں۔
ادھر ترجمان اسلام آباد پولیس نے اپنے بیان میں بتایا کہ نامزد چیف جسٹس کو قانون کے مطابق سکیورٹی فراہم کر دی گئی جبکہ ان کا چیف سکیورٹی آفیسر بھی مقرر کر دیا گیا۔
رواں سال 21 جون کو صدر مملکت عارف علوی نے جسٹس قاضی فائزعیسیٰ کی بطور چیف جسٹس پاکستان تعیناتی کی منظوری دی تھی جس کے بعد وزارت قانون نے نوٹیفکیشن جاری کیا تھا۔
نوٹیفکیشن میں بتایا گیا کہ تعیناتی کا اطلاق 17 ستمبر 2023 سے جسٹس عمر عطا بندیال کی ریٹائرمنٹ پر ہوگا۔ صدر مملکت نے چیف جسٹس کی تعیناتی آئین کے آرٹیکل 175 اے تین کے تحت کی۔
صدر مملکت ڈاکٹر عارف علوی نے جسٹس قاضی فائز عیسیٰ کی بطور چیف جسٹس آف پاکستان تعیناتی کردی
تعیناتی کا اطلاق 17ستمبر 2023ء سے جسٹس عمر عطا بندیال کی ریٹائرمنٹ سے ہوگا
— The President of Pakistan (@PresOfPakistan) June 21, 2023