کراچی: محکمہ موسمیات نے شہر قائد میں کل اور پرسوں بارش کی پیشگوئی کی ہے۔
تفصیلات کے مطابق محکمہ موسمیات ارلی وارننگ سینٹر نے پیش گوئی کی ہے کہ آج شہر کا مطلع صاف اور تیز دھوپ رہنے کی توقع ہے، تاہم جمعرات کو شہر کے شمال/شمال مشرقی (مضافاتی علاقوں) میں گرج چمک کے ساتھ ہلکی بارش کا امکان ہے۔
محکمہ موسمیات کے مطابق جمعہ کو جزوی ابر آلود موسم کے ساتھ شہر میں گرج چمک کے ساتھ ہلکی بارش کا امکان ہے۔
موسمیات کا کہنا ہے کہ مغربی ہواؤں کا نیا سلسلہ آج بلوچستان میں داخل ہوگا۔
سسٹم کے زیر اثر جامشورو، حیدر آباد، مٹیاری، ٹھٹھہ، ٹنڈو الہیار، ٹنڈو محمد خان، میرپور خاص، سانگھڑ، عمر کوٹ، نوشہرو فیروز، جیکب آباد، قمبر شہداد کوٹ، شکارپور، گھوٹکی، سکھر، بدین میں آج کہیں کہیں بارش کا امکان ہے۔
صوبے کے اکثر اضلاع میں 17 سے 20 مارچ کے دوران گرج چمک کے ساتھ درمیانی شدت کی بارش ہو سکتی ہے، اور بیش تر مقامات پر گرد آلود ہوائیں بھی چل سکتی ہیں۔
