کراچی کے اکثر علاقوں میں اچانک موسم تبدیل ہوا اور صبح کے وقت بجلی زور زور سے کڑکی، بادل بھی گرجے اور اس کے بعد برس پڑے۔
اے آر وائی نیوز کے مطابق پہلے روزے کو کراچی کے شہریوں کو خوشگوار حیرت ہوئی جب وہ سحری کرنے کے بعد کچھ خواب خرگوش کے مزے لے رہے تھے کہ اچانک بجلی کی کڑک اور بادلوں کی گرج سے ان کی آنکھ کھلی تو جاگنے پر تیز بارش نے ان کا استقبال کیا۔
شاہراہ فیصل، گلشن حدید، گلشن اقبال، سرجانی ٹاؤن، نیو کراچی، نارتھ ناظم آباد، سعدی ٹاؤن، صفورا، اورنگی ٹاؤن، فیڈرل بی ایریا، صدر، کھارادر، لیاقت آباد، ایم اے جناح روڈ، آئی آئی چندریگر روڈ سمیت شہر کے اکثر علاقوں میں تیز بارش ہوئی اور کہیں کہیں ہلکی بارش نے انٹری دی۔ گرج چمک کے ساتھ دھواں دھار بارش کا سلسلہ مختصر رہا تاہم اس بارش نے شہریوں کا پہلا روزہ خوشگوار بنا دیا۔
محکمہ موسمیات نے بارش کے اعداد وشمار جاری کردیے ہیں جس کے مطابق سب سے زیادہ بارش پی اے ایف بیس پر 12 ملی میٹر ریکارڈ کی گئی، اورنگی ٹاؤن میں 2.4 ملی میٹر، گلشن حدید میں ایک ملی میٹر ریکارڈ کی گئی
شہر قائد میں موسم ابر آلود ہے اور کہیں ہلکی تو کہیں تیز بارش کا سلسلہ جاری ہے۔
