لاہور : صوبائی وزیرِ قانون رانا ثناءاللہ نے انکشاف کیا کہ اگر آج بنی گالہ کی تلاشی شروع کردی جائے تو وہاں سے کوکین، چرس اور شراب بڑی مقدار میں برآمد ہو جائے گی۔
تفصیلات کے مطابق صوبائی وزیر قانون رانا ثناءاللہ نے میڈیا سے بات کرتے ہوئے کہا ہے کہ حکومت جمہوریت کی بقاء اور عوام الناس کے تحفظ کے لیے ہر قسم کے اقدام کی انجام دہی میں ذرا ہچکچاہٹ سے کام نہیں لے گی۔
انہوں نے کہا کہ تحریک انصاف پُر امن احتجاج کرتی تو ہمیں کوئی اعتراض نہیں ہوتا لیکن عمران خان نے اسلام آباد میں کارِ حکومت نہیں چلنے دینے کا اعلان کیا تھا اور اپنے کارکنوں کو اکسایا تھا کہ اگر کوئی روکے تو وہیں دھرنا دے دینا،ہم دارالخلافہ کو یرغمال بننے نہیں دیں گے۔
اس موقع پر انہوں نے خاتون کارکنان کی گرفتاریوں کی تردید کرتے ہوئے میڈیا کو بتایا کہ تحریک انصاف کی کسی خاتون کارکن کو گرفتار نہیں کیاگیا ہے،پورے پنجاب سے 838 افراد کو گرفتار کیا گیا ہے ملتان سے29 افرادکو حراست میں لیا ہے جب کہ لاہور ریجن میں 208 کارکنوں کو گرفتارکیا گیاہے۔
رانا ثناء اللہ نے بہ طور طنز کہا کہ عمران خان کی کال پر بنی گالہ صرف 400سے 450لوگ پہنچے ہیں حالانکہ عمران خان صاحب نے جہاں جلسہ کرنے کا کہا وہاں ان کو پنجاب حکومت نے جلسہ کرنے کا موقع دیا،ان کی کال پر تو پورے پنجاب میں 10بندے بھی نہیں نکلے۔
