راولپنڈی: محکمہ انسداد دہشت گردی کو 13 سال بعد راولپنڈی خودکش حملے سے متعلق بڑی کامیابی مل گئی۔
ترجمان سی ٹی ڈی کے مطابق راولپنڈی میں خفیہ اطلاعات پر کارروائی کے دوران انتہائی مطلوب مبینہ دہشت گرد گرفتار کر لیا گیا۔
سی ٹی ڈی ترجمان کے مطابق دہشت گرد کی شناخت اکمل کے نام سے ہوئی جو کہ راولپنڈی خودکش حملے میں ملوث تھا، مبینہ دہشت گرد سے بھاری مقدار میں دھماکا خیز مواد، چار ڈیٹونیٹراور سیفٹی فیوز برآمد کئے گئے۔
یہ بھی پڑھیں: سی ٹی ڈی کا سرچ آپریشن، 4 دہشت گرد ہلاک
ابتدائی تفتیش میں مبینہ دہشتگرد کے راولپنڈی میں خود کش حملےمیں ملوث ہونے کا انکشاف ہوا تھا، مبینہ دہشت گرد کے دو ساتھی فوجی عدالت سے سزا کے بعد جیل میں ہیں۔
سی ٹی ڈی نے گرفتار دہشتگرد کیخلاف مقدمہ درج کرتے ہوئے مزید تحقیقات شروع کردی ہیں۔
واضح رہے کہ سال 2009 میں راولپنڈی سول لائن میں خودکش حملہ ہوا تھا جس کے نتیجے میں 36 افراد شہید ہوئے تھے۔
