The news is by your side.

Advertisement

لوٹ کے پیسوں سے خیرات کرنے والا ’رابن ہڈ‘ گرفتار

دہلی: لُوٹ مار کے پیسوں سے خیرات کرنے والے بھارتی ’رابن ہڈ‘ کو پولیس نے آخر کار گرفتار کر لیا۔

تفصیلات کے مطابق بھارتی دارالحکومت دہلی میں پولیس نے ایک ایسے شخص کو گرفتار کیا ہے جو گھروں میں مبینہ طور پر چوری کی وارداتیں کر کے مہنگی کاریں خریدتا تھا اور ’خیرات‘ بھی کرتا تھا۔

تیس سالہ انڈین ’رابن ہڈ‘ کے بارے میں معلوم ہوا کہ وہ ریاست بہار میں اپنے آبائی علاقے سے ضلعی الیکشن بھی لڑنے والا تھا۔

پولیس کے بیان کے مطابق عرفان نامی یہ شخص غریب لوگوں کا مسیحا بننے کے لیے چوری کے پیسوں سے خیرات کرتا تھا اور ہیلتھ کیمپس بھی چلاتا تھا۔

دہلی کرائم برانچ کا کہنا ہے کہ عرفان مشہور برطانوی افسانوی ڈاکو رابن ہڈ کے نام سے مشہور تھا، اور اسے رواں ہفتے ایک خفیہ اطلاع پر گرفتار کیا گیا، اور اس کے پاس سے جیگوار اور دو نسان کاریں ملیں۔

ملزم نے اعتراف کرتے ہوئے کہا کہ اس کا گینگ پوش علاقوں میں صرف بند گھروں کو نشانہ بناتا تھا، اور وہ صرف جیولری اور نقد رقم چوری کرتے تھے، تاہم کرونا وبا کے باعث جب لوگ زیادہ تر گھروں میں تھے تو اس گینگ نے زیادہ وارداتیں نہیں کیں۔

عرفان کی گرفتاری کے بعد پنجاب کے شہر جالندھر سے ان کے تین اور ساتھی بھی گرفتار ہوئے۔ پولیس نے ملزم سے 2 فرانسیسی پستول اور جیولری بھی برآمد کی۔

Comments

یہ بھی پڑھیں