ماسکو : روس کے صدر ولادیمیر پیوٹن نے چینی صدر شی جن پنگ سے ملاقات میں چین کی جانب سے یوکرین کے خلاف جنگ کے منصوبے پر بات چیت کرنے پر رضامندی کا اظہار کیا ہے۔
تفصیلات کے مطابق چینی صدر شی جن پنگ تین روزہ سرکاری دورے پر روس کے دارالحکومت ماسکو پہنچ گئے جہاں انہوں نے اپنے ہم منصب پیوٹن سے ملاقات کی۔
غیرملکی خبر رساں ادارے کی رپورٹ کے مطابق روسی صدر ولادیمیر پیوٹن نے کہا ہے کہ وہ چینی صدر کے ماسکو کے انتہائی متوقع دورے کے دوران یوکرین کے شدید بحران کو حل کرنے کے لیے شی جن پنگ کے 12 نکاتی منصوبے پر تبادلہ خیال کریں گے۔
ملاقات میں دونوں ملکوں کے صدور نے ایک دوسرے کو پیارے دوست کہا روسی صدر نے کہا کہ ہم مذاکراتی عمل کے لیے ہمیشہ تیار ہیں۔
واضح رہے کہ چین نے گزشتہ ماہ روس یوکرین جنگ کے خاتمے کے لیے ایک منصوبہ جاری کیا تھا، اس میں دشمنی بند کرنا اور امن مذاکرات کا دوبارہ آغاز شامل ہے لیکن جمعہ کو امریکہ نے متنبہ کیا کہ چین کا یہ امن منصوبہ ایک حربہ بھی ہوسکتا ہے۔
قبل ازیں چینی صدر کا طیارہ روس کے مقامی وقت کے مطابق 12بجکر59منٹ پر پیر کو ماسکو کے ونوکووو ایئرپورٹ پر پہنچا، جہاں ان کا شاندار استقبال کیا گیا، چینی صدر اپنے روسی ہم منصب ولادیمیر پیوٹن کی دعوت پر20تا 22مارچ تک روس کا 3 روزہ سرکاری دورہ کر رہے ہیں۔
