نئے سال کی آمد پر ماضی کی نامور اداکارہ اور لیجنڈ دلیپ کمار کی بیوہ سائرہ بانو سے ملنے بالی وڈ سپراسٹار عامر خان ان کے گھر پہنچ گئے۔
اس موقع پر عامر خان کے ہمراہ ان کی ماں زینت حسین اور سابق بیوی کرن راؤ بھی موجود تھیں۔ سائرہ بانو نے مسٹر پرفیکشنسٹ اور ان کے اہلخانہ سے ملاقات کی تصویر اپنے انسٹاگرام اکاؤنٹ پر شیئر کی۔
سائرہ بانو نے عامر خان کی تعریف کرتے ہوئے کہا کہ ’عامر کافی مشکل وقتوں میں بھی میرے ساتھ رہے ہیں۔ جب میں دلیپ صاحب کی سوانح عمری ’دی سبسٹنس اینڈ دی شیڈو‘ کے لیے مواد اکٹھا کر رہی تھی، عامر نے میری کافی مدد کی۔
سائرہ نے عامر اور اپنے آنجہانی شوہر اداکار دلیپ کمار کے درمیان تعلقات کے بارے میں بھی بات کی۔ سائرہ نے بتایا کہ دلیپ کمار عامر کی حقیقت سے قریب اداکاری کو پسند کرتے تھے۔
سوشل میڈیا پر پوسٹ کی گئی تصاویر میں دیکھا جاسکتا ہے کہ سائرہ صوفے پر بیٹھی ہیں جبکہ عامر ان کے قریب نیچے قالین پر بیٹھے ہیں۔
کرن راؤ قریب ہی صوفے پر بیٹھی نظر آرہی ہیں جبکہ عامر کی والدہ بھی سائرہ کے پاس بیٹھی ہیں اور وہ کسی بات پر ہنس رہے ہیں۔ تصاویر میں ان کی بہن نگہت خان بھی نظر آرہی ہیں۔
زیادہ تر تصاویر میں عامر خان سائرہ کے گھٹنوں پر ہاتھ رکھے ہوئے نظر آرہے ہیں۔ سائرہ نے تصاویر کے کیپشن میں لکھا کہ ’کیلنڈر کے ہر موڑ کے ساتھ، زندگی کھلتی اور بدلتی رہتی ہے۔ جیسے جیسے وقت آگے بڑھتا ہے، ہمارے وجود میں نئی زندگی سانس لیتی نظر آتی ہے‘۔
