اسلام آباد: رہنما پاکستان تحریک انصاف (پی ٹی آئی) سلمان اکرم راجہ کا کہنا ہے کہ جو اس الیکشن میں ہمارے ساتھ ہوا یہ جمہوریت پر حملہ ہے۔
پارٹی رہنماؤں کے ہمراہ پریس کانفرنس میں سلمان اکرم راجہ نے کہا کہ الیکشن مہم میں ہر روز ہمارے ورکرز کو اٹھایا جا رہا تھا، پاکستان کے عوام نے 8 فروری کو بڑی تعداد میں ووٹ دیا، ہم سے بلے کا نشان چھینا لیکن عوام نے پی ٹی آئی کے حق میں تاریخ ساز فیصلہ دیا۔
سلمان اکرم راجہ نے کہا کہ اپنے حلقے میں ایک لاکھ ووٹ سے میں جیت رہا تھا، میری اہلیہ بطور پولنگ ایجنٹ آر او دفتر میں تھی تو انہیں باہر نکال دیا گیا، رات ساڑھے 10 بجے مجھے آر او آفس سے نکال دیا گیا، دوسرے دن ایک بجے فارم 47 کے تحت میرے خلاف نتیجہ کا اعلان کیا گیا، 8 فروری کی رات میں ان سے جس حد تک دھاندلی ہو سکی کی گئی، عوام نے ووٹ دیا لیکن رات کے اندھیرے میں مینڈیٹ چوری کیا گیا۔
انہوں نے کہا کہ پولنگ اسٹیشن سے لے کر آر او آفس آنے تک دھاندلی کی مثال بنائی گئی، فارم 45 کے مطابق جو نتائج آنے تھے ان کو مکمل طور پر تبدیل کیا گیا، عالمی میڈیا دنیا کو بتائے کہ پاکستان کے عوام کو حق حکمرانی سے محروم کیا جا رہا ہے، ہم نے تمام اصل فارم 45 آن لائن بھی دستیاب کر دیے ہیں۔
ان کا کہنا تھا کہ عوام کا مینڈیٹ کو چوری کیا گیا تو پاکستان میں استحکام نہیں آئے گا، نیشنل اور صوبائی اسمبلی کے پہلے ٹرن آوٹ اور بعد کے ٹرن آوٹ میں بڑا فرق ہے، عالمی آبزرورز کو چاہیے کہ دنیا کو دکھائیں کس طرح کی دھاندلی کی گئی ہے۔
سلمان اکرم راجہ نے کہا کہ کراچی میں ہم بڑے اسکیل پر جیت رہے تھے، فارم 47 میں ہمیں کراچی سے کوئی سیٹ نہیں ملی، ہم نے تمام فارم 45 الیکشن کمیشن میں جمع کروا دئیے ہیں، یہ سب فارم 45 کوئی بھی نہیں کہہ سکتا کہ نقل بنائے گئے ہیں۔
