لاہور: پاکستان کرکٹ بورڈ (پی سی بی) نے سابق کرکٹر سلمان بٹ کو بطور کنسلٹنٹ سلیکشن کمیٹی ہٹانے کا اعلان کردیا۔
اے آر وائی نیوز کے مطابق چیف سلیکٹر وہاب ریاض نے نیوز کانفرنس کرتے ہوئے کہا کہ کچھ چیزوں کی وضاحت دینا ضروری ہے، سلمان بٹ کے نام پر بہت بات ہورہی ہے وہ رائے دینے کی حد تک ہیں سلمان بٹ پی سی بی کے کسی پینل پر نہیں ہیں۔
وہاب ریاض نے کہا کہ سلمان بٹ کا نام واپس لے لیا ہے، سلمان بٹ میری ٹیم کا حصہ نہیں ہوں گے، بطور چیف سلیکٹر میری ذمہ داری ہے کہ میرے ساتھ لوگ کون ہوں گے۔
انہوں نے کہا کہ بہت باتیں کی جارہی تھی نہیں چاہتا کہ سلمان بٹ سے متعلق غلط باتیں کی جائیں، نہیں چاہتا کہ لوگ سلمان بٹ سے میرے تعلق پر تنقید کریں۔
چیف سلیکٹر نے کہا کہ دورہ آسٹریلیا کے لیے ٹیم سلیکشن میں سلمان بٹ کا کوئی کردار نہیں تھا۔
وہاب ریاض نے تصدیق کی کہ یکم جنوری سے اسد شفیق بطور کنسلٹنٹ سلیکشن کمیٹی ممبر ذمہ داریاں انجام دیں گے۔
Wahab Riaz’s press conference at GSL. https://t.co/qx4qDbDaYj
— Pakistan Cricket (@TheRealPCB) December 2, 2023
واضح رہے کہ سلمان بٹ کے سلیکشن کمیٹی کے کنسلٹنٹ رکن بننے پر سابق چیئرمین پی سی بی رمیز راجہ نے بھی پی سی بی کو تنقید کا نشانہ بنایا تھا۔
رمیز راجہ کا کہنا تھا کہ ایک ایسے کھلاڑی کو سلیکشن کمیٹی میں شامل کرنا جو میچ فکسنگ کی وجہ سے جیل جا چکا ہے پاگل پن ہے۔
ان کا کہنا تھا کہ جن کرکٹرز نے ملک کا نام بدنام کیا انہیں اپنی گروسری کی دکانیں کھولنی چاہیے، ان کھلاڑیوں کو موقع دینے سے پاکستان کرکٹ کا نقصان ہوگا۔
واضح رہے کہ پی سی بی نے گزشتہ دنوں سابق پاکستانی کرکٹرز کامران اکمل، راؤ افتخار انجم اور سلمان بٹ کو چیف سلیکٹر وہاب ریاض کے کنسلٹنٹ ممبرز کے طور پر تعینات کیا تھا۔
