ممبئی : بالی ووڈ اداکار سلمان خان نے آخرکار اپنی فلم کے سیٹ پر مختصر لباس پہننے والی خواتین کے بارے میں دیے گئے بیان کے بعد خود پر ہونے والی تنقید کا جواب دے دیا۔
مشہور بھارتی ٹی وی شو آپ کی عدالت میں سوالات کے جواب دیتے ہوئے سلمان خان نے اپنے مؤقف کا دفاع کیا اور کہا کہ خواتین جتنی ڈھکی ہوئی ہوں گی ان کیلئے اتنا ہی اچھا ہے۔
یہ تنازعہ اس وقت پیدا ہوا تھا جب فلم ’’کسی کا بھائی کسی کی جان‘‘ میں ان کی ساتھی اداکارہ پلک تیواری نے فلم کے سیٹ پر سلمان خان کا خواتین کے لباس سے متعلق مقررہ اصول بیان کیا جس پر مختلف حلقوں کی جانب سے مثبت اور منفی ردعمل سامنے آیا۔
میڈیا رپورٹس کے مطابق دبنگ خان نے مزید کہا کہ یہ مسئلہ خواتین کے ساتھ نہیں بلکہ مردوں کے ساتھ ہے کہ وہ جن نظروں سے خواتین کو دیکھتے ہیں، ان میں آپ کی بہنیں، بیوی اور ماں بھی شامل ہے اور یہ بات مجھے اچھا نہیں لگتی۔
ایک سوال کے جواب میں انہوں نے کہا کہ جب ہم کوئی اچھی فلم بناتے ہیں تو لوگ بڑی تعداد میں اپنے گھر والوں کے ساتھ دیکھنے آتےہیں، لہٰذا ایسی فلمیں نہ بنائیں کہ لوگ ہماری ہیروئنز اور عورتوں کو بری نگاہوں سے دیکھیں۔
