ممبئی: بالی ووڈ کے سلطان سلمان خان کا ٹوئٹر اکاؤنٹ ہیک کرکے ڈارک ویب پر فروخت کردیا گیا؟
بھارتی میڈیا رپورٹس کے مطابق اداکار سلمان خان سمیت متعدد معروف شخصیات کے اکاؤنٹ ہیک کرکے ہیکرز نے ایلون مسک کو ادائیگی کرنے اور 400 ملین صارفین کے ڈیٹا کو ڈارک ویب پر لیک کرنے کی دھمکی دی ہے۔
ٹوئٹر پر سلمان خان کے فالوورز کی تعداد 40 ملین سے زائد ہے جبکہ اداکار ٹوئٹر پر سب سے زیادہ فالو کی جانے والی شخصیات میں دوسرے نمبر پر موجود ہیں۔
دبنگ خان کے اکاؤنٹ کے ساتھ ساتھ گوگل کے چیف ایگزیکٹو سندر پچائی، امریکی گلوکار چارلی پوتھ اور دیگر شخصیات کے اکاؤنٹ بھی ہیک کیے گئے ہیں۔
بھارتی میڈیا کا بتانا ہے کہ ہیکرز کی جانب سے سلمان خان سمیت دیگر شخصیات کے فون نمبر ودیگر معلومات کو بطور ثبوت بھی پیش کیا ہے۔
یہ پڑھیں: ٹویٹر کے چار سو ملین صارفین کا ڈیٹا چوری
اس میں بھارتی وزرات اطلاعات ونشریات اور امریکی خلائی ایجنسی ناسا کے اکاؤنٹس کا ڈیٹا اور ورلڈ ہیلتھ آرگنائزیشن کے اکاؤنٹس کا ڈیٹا بھی شامل ہے
ہیکرز نے اپنی پوسٹ میں لکھا کہ ٹوئٹر یا ایلون مسک اگر آپ پوسٹ پڑھ رہے ہیں تو آپ کو پہلے ہی 54 ملین سے زائد صارفین کا ڈیٹا لیک ہونے پر جی ڈی پی آر جرمانے کا خطرہ ہے، اب 400 ملین صارفین کا ڈیٹا لیک ہونے پر جرمانے کے بارے میں سوچیں۔
واضح رہے کہ دو ماہ میں یہ دوسری بار ہوا ہے جب ٹوئٹر کا ڈیٹا چوری ہوکر ڈارک ویب پر فروخت کے لئے دیا گیا ہو گزشتہ ماہ یہی معاملہ سامنے آیا تھا۔
