کراچی: قومی کرکٹ ٹیم کے سابق کپتان سرفراز احمد کی کراچی کی سڑکوں پر موٹر سائیکل پر سیر کرنے کی ویڈیو وائرل ہوگئی۔
تفصیلات کے مطابق قومی ٹیم کے سابق کپتان سرفراز احمد بیٹے عبداللہ کے ہمراہ موٹر سائیکل کی سیر کو نکلے تو شائقین کرکٹ نے ان کی ویڈیو بنا کر سوشل میڈیا پر شیئر کردی۔
ایک مداح نے سرفراز احمد سے کہا کہ ’سیفی بھائی نیوزی لینڈ کا اسکواڈ تو گیا، ہم سے آکر گراؤنڈ میں سیریز کھیل لیں۔‘
سرفراز احمد نے مداح کو جواب دیا کہ ’ہاں اب یہی رہ گیا ہے۔‘
واضح رہے کہ اس سے قبل بھی سرفراز احمد کی بیٹے عبداللہ کے ہمراہ کرکٹ کھیلنے کی ویڈیو وائرل ہوئی تھیں جسے مداحوں کی جانب سے خوب سراہا گیا تھا۔
یاد رہے کہ نیوزی لینڈ کے خلاف قومی اسکواڈ میں سرفراز احمد کو ڈراپ کردیا گیا ہے، قومی ٹیم نیوزی لینڈ کے خلاف تین ون ڈے اور پانچ ٹی ٹوینٹی میچز پر مشتمل سیریز کھیلے گی۔
دونوں ٹیموں کے درمیان ون ڈے میچز 17، 19 اور 21 ستمبر کو راولپنڈی میں کھیلے جائیں گے جبکہ 5 میچوں پر مشتمل ٹی ٹوینٹی سیریز 25 ستمبر سے لاہور میں کھیلی جائے گی۔
