نئی دہلی: بھارتی پولیس نے انکشاف کیا ہے کہ بالی ووڈ اداکار ستیش کوشک کی موت مشتبہ حالات میں ہوئی ہے۔
بھارتی میڈیا کے مطابق بالی ووڈ کے سینیئر اداکار ستیش کوشک کی موت کے معاملے میں نیا انکشاف سامنے آیا ہے، پولیس نے دعویٰ کیا ہے کہ ان کے فارم ہاؤس سے قابل اعتراض ادویات برآمد ہوئی ہیں۔
رپورٹس کے مطابق بالی ووڈ کے ورسٹائل اداکار و ہدایت کار ستیش کوشک کا اچانک دل کے دورے سے موت واقع ہو گئی تھی، تاہم اب دہلی پولیس کا کہنا ہے کہ ستیش کوشک کی موت مشتبہ حالات میں ہوئی ہے۔
دہلی پولیس کی ٹیم نے فارم ہاؤس جا کر جانچ کی تو کچھ ’قابل اعتراض ادویات‘ برآمد ہوئیں، جس کے بعد پولیس ستیش کوشک کے تفصیلی پوسٹ مارٹم اور وسرا رپورٹ کا انتظار کر رہی ہے، پولیس کا کہنا ہے کہ تمام رپورٹس سامنے آنے کے بعد ہی پوری تصویر واضح ہو سکے گی۔
دوسری طرف پولیس نے ہولی پارٹی میں آنے والے مہمانوں کی فہرست بھی تیار کر لی ہے، جو اس وقت فارم ہاؤس میں موجود تھے، پولیس اس صنعت کار سے بھی پوچھ تاچھ کرنا چاہتی ہے جو ستیش کوشک کی موت کے بعد سے فرار ہے۔
ویڈیو: ستیش کوشک کی آخری رسومات، سلمان خان بھی آبدیدہ ہوگئے
پولیس تحقیقات میں یہ بھی جاننے کی کوشش کی جا رہی ہے کہ فارم ہاؤس سے ملنے والی قابل اعتراض ادویات کے پیکٹ کس کے لیے اور کیوں آئے تھے؟
واضح رہے کہ ستیش کوشک دہلی میں اپنے ایک دوست کے فارم ہاؤس پر ہولی پارٹی کے لیے آئے تھے، اس دوران ان کی طبیعت خراب ہو گئی، جس کے بعد انھیں اسپتال لے جایا گیا لیکن وہ دم توڑ گئے، ڈاکٹروں کے مطابق اداکار کی موت دل کا دورہ پڑنے سے ہوئی۔
