ریاض: سعودی حکومت نے غیرملکی ملازمین کو خوشخبری سنادی ہے جس کے مطابق ورک ویزے کی میعاد ایک سال سے بڑھانے کا اعلان کردیا گیا ہے۔
عرب میڈیا کے مطابق سعودی وزارت محنت و سماجی بہبود نے غیرملکی ورکروں کے ورک ویزے کی میعاد میں ایک سال کی بجائے دو برس کی مفت توسیع کا اعلان کردیا ہے۔
سعودی وزارت محنت نے سماجی رابطے کی ویب سائٹ ٹویٹر پر اپنے آفیشل اکاؤنٹ پر غیرملکیوں کو یہ اطلاع دیتے ہوئے کہا کہ اس کا مقصد پرائیویٹ اداروں کو آسانیاں فراہم کرنا اور ان کو درپیش مسائل اور مشکلات کو حل کرنا ہے۔
وزارت محنت کا کہنا تھا کہ ہم یہ چاہتے ہیں کہ نئے ورک ویزوں کا اجرا کے خواہش مند نجی ادارے اس سہولت سے زیادہ سے زیادہ فائدہ اٹھائیں۔
مزید پڑھیں: سعودی حکومت کی مقامی شہریوں کو سرمایہ کاری کی پیش کش
واضح رہے کہ سعودی عرب میں اس سے قبل ورک ویزے کی میعاد صرف ایک سال تھی تاہم اب اس میں تبدیلی کی جارہی ہے۔
خیال رہے کہ گزشتہ روز سعودی عرب کی حکومت نے مقامی شہریوں کو پانچ اہم شعبوں میں کاروبار کے نئے مواقع فراہم کرنے کا اعلان کیا تھا۔
سعودی عرب کے وزیر برائے مزدور اور سماجی ترقی نے اعلان کیا کہ حکومت مقامی شہریوں کو کاروبار کی طرف راغب کرنے کے لیے سرگرم ہے اور انہیں مکمل ترغیب فراہم کررہی ہے۔
اُن کا کہنا تھا کہ تجارتی اور کاروباری شعبے میں مقامی شہریوں کے لیے پانچ مختلف پیشوں میں سرمایہ کاری کا اعلان کیا گیا۔
