ریاض : دنیا بھر سے روزگار کیلیے غیر قانونی طریقے سے سعودی عرب آنے والے ہزاروں تارکین وطن کو حراست میں لے لیا گیا۔
سعودی ذرائع ابلاغ کی رپورٹ کے مطابق سعودی حکام نے گزشتہ ایک ہفتے کے دوران کی گئی کارروائی میں 13 ہزار 939 افراد کو گرفتار کیا ہے، مذکورہ گرفتاریاں27 جولائی سے دو اگست 2023کے درمیان ہوئیں۔
اس حوالے سے غیرقانونی تارکین کے خلاف کام کرنے والی مشترکہ کمیٹی نے کہا ہے کہ گرفتار شدگان میں سے 7894 اقامہ قوانین کی خلاف ورزی کر رہے تھے۔
3839گرفتار شدگان سرحدی قوانین کی خلاف ورزی کے مرتکب تھے جبکہ 2206 تارکین لیبر قوانین کی خلاف ورزی میں ملوث تھے۔
مذکورہ عرصے کے دوران 933 افراد گرفتار ہوئے ہیں جو سرحد عبور کرکے ملک میں غیر قانونی طور پر داخل ہونے کی کوشش کر رہے تھے۔
ان میں سے 41 فیصد یمنی، 58 فیصد ایتھوپین جبکہ ایک فیصد دیگر ممالک کے تارکین تھے، اسی طرح سرحد عبور کرکے غیر قانونی طور پر ملک سے باہر جانے کی کوشش کرتے ہوئے 44 افراد گرفتار ہوئے ہیں۔
کمیٹی نے اپنے بیان میں مزید کہا ہے کہ غیرقانونی تارکین کو سہولیات فراہم کرنے کے جرم میں 8افراد بھی گرفتار ہوئے ہیں۔
