ریاض : سعودی ولی عہد شہزادہ محمد بن سلمان نے متعلقہ حکام کو ہدایت کی ہے کہ انتہائی ضرورت مند شہریوں کے مسائل کا لحاظ رکھا جائے، مارکیٹوں پر نظر رکھی جائے اور نرخوں کو کنٹرول کیا جائے۔
سرکاری خبر رساں ایجنسی ایس پی اے کے مطابق ولی عہد شہزادہ محمد بن سلمان نے پیر کو جدہ کے قصر السلام میں اقتصادی و ترقیاتی امور کونسل کے اجلاس کی صدارت کی ہے۔
شہزادہ محمد بن سلمان نے اجلاس میں کہا کہ بین الاقوامی تبدیلیوں کے باعث انتہائی ضرورت والی بعض چیزیں مہنگی ہوگئی ہیں۔ ضرورت مند شہریوں کے حالات کا خیال کیا جائے۔
سعودی ولی عہد نے وزارتوں اور متعلقہ سرکاری اداروں سے کہا کہ وہ اپنی ذمہ داری احسن طریقے سے انجام دیں, اشیاء کی رسد کو یقینی بنائیں۔
انہوں نے ہدایت دی کہ بازاروں میں ہونے والی تبدیلیوں پر کڑی نظر رکھیں، مارکیٹ میں ضرورت کا سامان وافر مقدار میں مہیا اور ان کی قیمتیں کنٹرول میں رہیں۔
سعودی ولی عہد کا کہنا ہے کہ مبنی بر انصاف مسابقت کا تحفظ اور دکانداروں ک یحوصلہ افزائی کرتے ہوئے اجارہ داری کو روکا جائے۔ اجارہ داروں کو صارفین کے مفاد یا جائز مسابقت پر اثر انداز ہونے کی کسی صورت اجازت نہ دی جائے۔
اقتصادی و ترقیاتی امور کونسل کے اجلاس میں کئی اقتصادی و ترقیاتی امور کا جائزہ لیا گیا، خاص طور پر وزارت ماحولیات و پانی و زراعت اور وزارت اقتصاد و منصوبہ بندی کے ساتھ مل کر وزارت تجارت کی جانب سے سعودی مارکیٹوں میں ضرورت کی اہم اشیا کے نگرانی کی اہمیت اجاگر کی گئی تھی۔
اقتصادی و ترقیاتی امورکونسل کے اجلاس میں کورونا وبا سے متعلق صحت مسائل اور تبدیلیوں کے تناظر میں وزارت صحت کے ایجنڈے کا جائزہ لیا گیا۔
اقتصادی و ترقیاتی کونسل نے کورونا وبا کے اثرات اور اقتصادی سرگرمیوں پر سے پابندی اٹھانے کے فیصلے کے نتائج کا جائزہ بھی لیا، یہ جائزہ وزارت اقتصادیات و منصوبہ بندی نے پیش کیا تھا۔ اس حوالے سے دیگر کئی سفارشات پیش کی گئی ہیں۔
