ریاض: محکمہ پولیس نے شہریوں کے لیے ہدایات جاری کی ہیں جن میں بتایا گیا ہے کہ کسی مشکل کی صورت میں پولیس کی مدد کیسے طلب کی جائے۔
سعودی ویب سائٹ کے مطابق ٹویٹر پر ایک شخص نے دریافت کیا کہ سعودی عرب میں پولیس سے مدد طلب کرنے کا طریقہ کیا ہے؟
محکمہ پولیس کی جانب سے کہا گیا کہ پولیس کی اہم ذمہ داری امن عامہ کو برقرار رکھنا ہے جبکہ امدادی کاموں میں بھی پولیس سے تعاون لیا جاسکتا ہے۔
پولیس کو عربی میں شرطہ کہا جاتا ہے، ہائی وے پر گشت پر معمور پولیس پارٹی کو امن الطرق کہتے ہیں جس کی ذمہ داری شہری حدود سے باہر ہائی ویز پر سفر کرنے والوں کو امداد مہیا کرنا ہے۔ ٹریفک پولیس کو عربی میں مرور کہتے ہیں۔
سعودی عرب میں قانون سب کے لیے یکساں ہے، یہی وجہ ہے کہ یہاں امن و امان کی فضا برقرار ہے۔
محکمہ پولیس نے بتایا کہ پولیس کے ہنگامی امدادی یونٹ کو دوریات کہتے ہیں، دوریات علاقے کی گشتی پولیس کے دستوں کو بھی کہا جاتا ہے جن کی ذمہ داری اپنے اپنے علاقے میں امن و امان کی صورتحال کو برقرار رکھنا ہوتا ہے۔
سعودی عرب میں ہنگامی پولیس امداد کے لیے مکہ اور ریاض ریجن کے لیے ٹول فری نمبر 911 جبکہ سعودی عرب کے دیگر ریجنز کے لیے 999 نمبر مخصوص کیا گیا ہے۔
مکہ اور ریاض ریجن میں اگر ہنگامی بنیادوں پر پولیس امداد درکار ہو تو 911 پر کال کی جاسکتی ہے جو 24 گھنٹے اور ہفتے کے ساتوں دن کام کرتا ہے۔
پولیس کے مطابق امدادی نمبروں پر کال کر کے اہلکار کو مسئلہ بیان کریں جہاں سے فوری ایکشن لیتے ہوئے قریبی تھانے یا علاقے میں موجود گشتی پولیس کے یونٹس کو جائے وقوعہ پر بھیجا جاتا ہے۔
امدادی سینٹر کے علاوہ ہائی وے پولیس کا نمبر 996 ہے جو صرف مملکت کے ہائی ویز پر پیٹرولنگ پارٹی کے لیے مخصوص ہے تاکہ شاہراہوں پر سفر کرنے والوں کو کسی بھی قسم کی دشواری ہو تو وہ اس نمبر پر رابطہ کر کے فوری امداد حاصل کر سکتے ہیں۔
