جازان : سعودی عرب میں بارشوں کے دوران ایک خوفناک واقعہ پیش آیا ہے جس میں ایک لڑکی آسمانی بجلی کی زد میں آکر جاں بحق ہوگئی۔
مون سون کے موسم میں ہونے والی بارشوں اور موسم کی سختیوں نے جہاں لوگوں کے چہروں پر خوشیاں بکھیری ہیں تو کچھ لوگوں کیلئے یہ موسم اداسی کے لمحات بھی لے کر آیا۔
غیرملکی خبر رساں ادارے کی رپورٹ ک مطابق سعودی عرب کے جازان ریجن کی مشرقی کمشنری’العیدابی‘میں آسمانی بجلی گرنے سے ایک لڑکی ہلاک جبکہ ان کی بہن زخمی ہوگئیں۔
میڈیا سے گفتگو کرتے ہوئے متاثرہ خاندان کے سربراہ نے بتایا کہ جمعے کے روز ریجن میں گرج چمک کے ساتھ بارش کا سلسلہ جاری تھا کہ اسی اثنا میں انتہائی خوفناک انداز میں بجلی گرنے کی آواز سنائی دی۔
شہری نے مزید بتایا کہ آسمانی بجلی اس کے گھر پر گری جس سے اس کی دو بیٹیاں متاثر ہوئیں۔
بڑی بیٹی جن کی عمر 27 برس تھی بجلی گرتے ہی بے ہوش ہوگئی جبکہ دوسری بیٹی جو ان کے ساتھ ہی تھی وہ بھی متاثر ہوئیں۔
متاثرہ شخص کا مزید کہنا تھا کہ بیٹیوں کو فوری طبی امداد فراہم کرتے ہوئے ہسپتال لے جایا گیا جہاں پہنچ کر معلوم ہوا کہ بڑی بیٹی ہلاک ہوچکی تھیں جبکہ دوسری بیٹی کو ابتدائی طبی امداد فراہم کی گئی جس کے بعد ان کی حالت بہتر ہوگئی۔
