ریاض: سعودی عرب میں آئندہ تین ماہ کے لیے پیٹرول کی قیمتوں میں اضافہ کردیا گیا ہے۔
تفصیلات کے مطابق عرب ریاستوں کی جانب سے پیٹرول کی قیمت میں اضافے کے بعد سعودی عرب میں بھی پیٹرول کے نرخ بڑھا دئیے گئے ہیں، سعودی کی سرکاری پیٹرولیم کمپنی آرامکو کے مطابق ملک میں بینزین 91 پیٹرول کی قیمت 1.44 ریال فی لیٹر جبکہ بینزین 95 پیٹرول کی قیمت 2.10 ریال فی لیٹر کردی گئی ہے۔
ایس پی اے کی رپورٹ کے مطابق پیٹرول کی قیمتوں میں مذکورہ اضافے کا اطلاق 14 اپریل سے کیا گیا۔
رواں سال کی دوسری سہ ماہی کے لیے ڈیزل کی قیمت 0.47 ریال فی لیٹر، مٹی کے تیل کی قیمت 0.64 یال فی لیٹر اور ایل پی جی کی قیمت 0.75 ریال فی لیٹر مقرر کی گئی ہے۔
مزید پڑھیں: امارات، قطر اور عمان نے پیٹرول کے نرخوں میں اضافہ کردیا
قبل ازیں رواں سال جنوری میں تین ماہ کے لیے پیٹرول کی قیمت مقرر کی گئی تھی جس کے مطابق بینزین 91 پیٹرول کی قیمت 1.37 ریال فی لیٹر جبکہ بینزین 95 پیٹرول کے نرخ 2.02 ریال فی لیٹر مقرر کیے گئے تھے۔
آرامکو نے یہ اعلان بھی کیا کہ عالمی مارکیٹ میں قیمتوں میں تبدیلی کی صورت میں ملک میں پیٹرول کی قیمت بدیل کی جاسکتی ہے۔
یاد رہے کہ وزارت توانائی و معدنیات یہ اعلان کرچکی ہے کہ ہر تین ماہ میں پیٹرول کی قیمتوں کا جائزہ لیا جائے گا جبکہ دیگر عرب ممالک میں ہر ماہ پیٹرول کی قیمتوں کا تعین کیا جاتا ہے۔
