ریاض : سعودی عرب محکمہ ٹریفک نے ماہ رمضان المبارک کے دوران ریاض میں ٹرکوں کے داخلے پر نئی پابندیاں عائد کی ہیں۔
سعودی ذرائع ابلاغ کے مطابق محکمہ ٹریفک نے ٹوئٹر پر بیان میں کہا کہ ماہ رمضان کے دوران صبح آٹھ سے آدھی رات تک ریاض میں ٹرکوں کے داخلے پر مکمل پابندی رہے گی۔
محکمہ ٹریفک کا کہنا ہے کہ عوامی خدمات سے تعلق رکھنے والے ٹرکوں کو دوپہر12 سے رات12 بجے تک ریاض شہر میں داخلے کی اجازت ہوگی۔
محکمہ ٹریفک کا کہنا ہے کہ عام ٹرکوں کو رات 12 سے صبح 8 بجے تک ریاض شہر میں داخلے کی مکمل اجازت ہوگی۔ اس سے کوئی بھی ٹرک مستثنی نہیں ہوگا۔
محکمہ ٹریفک نے توجہ دلائی کہ جمعہ اور سنیچر کو رات7 سے12 بجے تک ریاض میں ٹرکوں کا داخلہ منع ہوگا۔ اس پابندی سے عوامی خدمات والے ٹرک مستثنیٰ رہیں گے۔
محکمہ ٹریفک نے کہا کہ مکہ خریص روڈ پر ایگزٹ13سے لے کر مشرق اور مغرب میں سفارتخانوں کے علاقے تک ٹرکوں کا داخلہ منع ہے۔
علاوہ ازیں کنگ فہد روڈ پر ایگزٹ4 سے میدان الجسائر تک بھی ٹرکوں کی آمد پر پابندی ہوگی۔ محکمہ ٹریفک نے تمام ٹرک مالکان اور ڈرائیوروں سے کہا ہے کہ وہ سب کی سلامتی کی خاطر مقررہ اوقات کی پابندی کریں۔
