ریاض : سعودی عرب میں پرائیویٹ اسکول میں زیر تعلیم طلباء و طالبات کے والدین نے حکومت سے مطالبہ کیا ہے کہ اسکولوں کی ضرورت سے زائد فیسوں کا نوٹس لیا جائے۔
سعودی عرب میں ایک طرف تو سرکاری اسکول بغیر کسی فیس کے مفت تعلیم دے رہے ہیں تو دوسری جانب نجی اور انٹرنیشنل اسکولوں کی سالانہ تعلیمی فیس کے اعداد وشمار آسمان سے باتیں کررہے ہیں جبکہ اسکول ٹرانسپورٹ اور یونیفارم فیس اس میں شامل نہیں۔
الوطن اخبار کے مطابق انٹرنیشنل اسکولوں نے اپنی ویب سائٹس پر فیسیوں کا جو چارٹ دے رکھا ہے اس کے مطابق نرسری کے مرحلے کی سالانہ فیس 10 تا 35 ہزار، پرائمری کےمرحلے کی 14 تا 25 ہزار، مڈل کے مرحلے کی 13 تا 24 ہزار اور ثانوی کے مرحلے کی 18 تا 50 ہزار ریال ہے۔
بچوں کے کئی والدین سوشل میڈیا پر مطالبہ کررہے ہیں کہ غیر سرکاری اسکولوں خصوصا انٹرنیشنل اسکولوں کی حد سے زیادہ فیسوں کا باریک بینی سے جائزہ لیا جائے اور فیس کی انتہائی حد مقرر کی جائے- یہ پابندی لگائی جائے کہ اسکول حد سے زیادہ فیس نہ لیں۔
نجی اسکولوں نے اپنی ویب سائٹس پر نرسری کے مرحلے کی جو فیسیں دی ہیں وہ 9 ہزار ریال سے لے کر 17 ہزار ریال کے درمیان ہیں جبکہ پرائمری کے مرحلے کی فیس 10 تا 18 ہزار ریال، مڈل کی 13 تا 18 اور ثانوی کی 16 تا 25 ہزار ریال مقرر کررکھی ہے۔
