ریاض: سعودی فوڈ اینڈ ڈرگس اتھارٹی نے مملکت میں 70 سے زیادہ جڑی بوٹیوں کی خرید وفروخت پر پابندی عائد کر دی۔
تفصیلات کے مطابق سعودی فوڈ اینڈ ڈرگس اتھارٹی نے (ایس ایف ڈی اے) نے ممنوعہ جڑی بوٹیوں کی فہرست اپنی ویب سائٹ پر جاری کی ہے جس میں جڑی بوٹی کے نام، عوام میں رائج نام، سائنٹیفک نام اور انسانی صحت کے لیے اس کے نقصانات بھی بتائے گئے ہیں۔
ایس ایف ڈی اے کا کہنا ہے کہ جڑی بوٹیاں فروخت کرنے والی دکانوں پر چھاپے مارے جائیں گے، چھاپہ مار ٹیم میں وزارت بلدیات و دیہی امور کے نمائندے شامل ہوں گے۔
سعودی فوڈ اینڈ ڈرگس اتھارٹی نے ہدایت کی ہے کہ جڑی بوٹیاں فروخت کرنے والے جڑی بوٹی کے ساتھ اس کا تعارف، اس کے استعمال کی آخری تاریخ چسپاں کریں۔دکان میں نمایاں جگہ پر جڑی بوٹیوں کا چارٹ جاری کریں۔
اس کے علاوہ ایس ایف ڈی اے اور وزارت بلدیہ کے مونو گرام کے ساتھ یہ تنبیہ بھی نمایاں کریں جڑی بوٹیوں سے علاج سائنٹیفک بنیادوں پر ثابت نہیں ہے۔
جڑی بوٹیاں فروخت کرنے والے دکان داروں پر یہ پابندی لگائی گئی ہے کہ وہ کسی بھی جڑی بوٹی یا مرکب جڑی بوٹیوں پر ایسی کوئی تحریر چسپاں نہ کریں جس میں دعوی کیا جا رہا ہو کہ اس جڑی بوٹی یا دیسی دواؤں سے فلاں مرض کا علاج ہوگا۔
سعودی فوڈ اینڈ ڈرگس اتھارٹی نے کہا کہ جڑی بوٹیاں کسی دعوے کے بغیر فروخت کی جاسکتی ہیں۔ایس ایف ڈی کی طرف سے اس کی اجازت ہے۔
