سعودی عرب اور ایران کے وزرائے خارجہ رمضان المبارک کے دوران ملاقات کریں گے۔
ایران اور سعودی عرب کے اعلیٰ سفارت کاروں نے رمضان المبارک کے اختتام سے قبل ملاقات کرنے پر اتفاق کیا ہے تاکہ ایک تاریخی دوطرفہ مفاہمتی معاہدے کو عملی جامہ پہنایا جا سکے۔
سرکاری سعودی پریس ایجنسی (SPA) نے پیر کو رپورٹ کیا کہ سعودی وزیر خارجہ شہزادہ فیصل بن فرحان اور ان کے ایرانی ہم منصب حسین امیر عبد اللہیان نے یہ فیصلہ ایک ہفتے سے بھی کم عرصے میں اپنی دوسری فون کال کے بعد کیا۔
ایس پی اے نے کہا کہ فون کال کے دوران عوامی جمہوریہ چین میں طے پانے والے سہ فریقی معاہدے کی روشنی میں متعدد مشترکہ امور پر تبادلہ خیال کیا گیا، دونوں وزرائے خارجہ نے ماہ رمضان کے دوران اپنے درمیان دو طرفہ ملاقات کرنے پر بھی اتفاق کیا۔
رپورٹ میں میٹنگ کی صحیح تاریخ یا مقام کی وضاحت نہیں کی گئی۔ رمضان المبارک گزشتہ ہفتے شروع ہوا اور اپریل کے تیسرے ہفتے میں ختم ہو گا۔ سعودی حکام نے کہا ہے کہ یہ ملاقات ان کے منقطع ہونے کے سات سال بعد تعلقات کی بحالی کا اگلا قدم ہے۔
