سعودی عرب میں پولیس نے لڑکی سے چھیڑخانی کرنے والے شخص کو گرفتار کرلیا ہے جو کہ لڑکی کا رشتے دار بتایا جاتا ہے۔
غیر ملکی ویب سائٹ کے مطابق حدود شمالیہ پولیس کے ترجمان نے بتایا کہ سوشل میڈیا پر ویڈیو کلپ پر وائرل ہوا ہے جس میں ایک لڑکی شکایت کررہی ہے کہ اس کا ایک رشتے دار چھیڑخانی کر رہا ہے اور اسے مسلسل پریشان کیے ہوئے ہے۔
پولیس ترجمان کے مطابق ویڈیو میں نظر آنے والے نوجوان کو شناخت کرکے گرفتار کرلیا ہے جو کہ مقامی شہری ہے اور اسے قانونی کارروائی کے بعد پبلک پراسیکیوشن کے حوالے کردیا گیا ہے۔
پولیس ترجمان نے اس حوالے سے مزید بتایا کہ ویڈیو کلپ میں شکایت کرنے والی لڑکی ان دنوں مملکت میں نہیں بلکہ بیرون ملک مقیم ہے اور یہ واقعہ بھی نیا نہیں بلکہ تین برس پرانا ہے اور اب سوشل میڈیا پر ویڈیو وائرل ہونے پر کارروائی کی گئی کیونکہ لڑکی نے اس سے متعلق اس سے قبل کوئی شکایت درج نہیں کرائی تھی۔
