کراچی: صوبائی وزیر تعلیم سندھ سعید غنی نے کرونا وبا کی تیسری لہر سے ممکنہ بچاؤ کے لئے اہم اعلان کردیا ہے۔
وفاقی وزیر تعلیم شفقت محمود نے آج ٹوئٹر پر جاری اپنے بیان میں کہا تھا کہ منگل کے روز این سی او سی کا خصوصی اجلاس ہوگا، جس میں صحت اور تعلیم کے وزرا شرکت کرینگے، اہم اجلاس میں ملک بھر میں تعلیمی ادارے بند یا کھلے رکھنے سے متعلق فیصلہ کیا جائے گا۔
وفاقی وزیر شفقت محمود کے ٹوئٹ کے بعد صوبائی وزیر تعلیم سندھ سعید غنی نے سندھ کے تمام سرکاری و نجی اسکولز پندرہ روز کیلئے بند کرنے کا اعلان کردیا ہے، انہوں نے بھی اس کا اعلان بذریعہ ٹوئٹر کیا۔
یہ بھی پڑھیں: کورونا کی تیسری لہر، تعلیمی اداروں سے متعلق کیا فیصلہ ہونے جارہا ہے؟
سعید غنی نے اپنے ٹوئٹ میں کہا کہ پہلی تا آٹھویں جماعت کو چھ اپریل سے پندرہ روز تک بند کرنے کا فیصلہ کیا ہے۔
صوبائی وزیر تعلیم نے اپنے ٹوئٹ میں کہا کہ محکمہ تعلیم سندھ نے فیصلہ کرونا کی صورتحال کے پیش نظر کیا، تاہم بچوں کی تعلیم کو آن لائن، ہوم ورک ودیگر ذرائع سے جاری رکھا جاسکتاہے۔
محکمہ تعلیم سندھ نے Covid کی صورتحال کے پیش نظر صوبے بھر کے تمام سرکاری و نجی اسکولوں میں آٹھویں جماعت تک میں 6 اپریل بروز منگل سے اگلے پندرہ روز کیلئے Physical کلاسز معطل کرنے کا فیصلہ کیا ہے تاہم بچوں کی تعلیم کو آن لائن، ہوم ورک اور دیگر ذرائع سے جاری رکھا جاسکتا ہے۔
— Senator Saeed Ghani (@SaeedGhani1) April 4, 2021
اس سے قبل وفاقی وزیر تعلیم شفقت محمود کا کہنا تھا کہ این سی اوسی میں جو بھی فیصلہ کیا جائے گا وہ متفقہ ہوگا۔
یاد رہے کہ کورونا کے پیش نظر 24 مارچ کو وفاقی وزیر تعلیم شفقت محمود نے پنجاب، خیبر پختونخوا اور آزاد کشمیر کے مخصوص علاقوں میں تعلیمی ادارے 11 اپریل تک بند رکھنے کا اعلان کیا تھا، انہوں نے یہ بھی کہا تھا کہ آئندہ ہونے والے بورڈز کے امتحانات شیڈول کے مطابق ہوں گے۔
