ماہ رمضان میں سحری کے وقت کون سی ڈش یا ایسی کون سی غذاؤں کا استعمال کیا جائے کہ جس سے دن بھر جسمانی توانائی برقرار رہے۔
سحری کے دوران غذا کا انتخاب اس لیے بہت اہم ہوتا ہے کیونکہ وہ دن بھر کے لیے ہمارے جسم میں ایندھن کا کام کرتی ہیں۔
اس حوالے سے اے آر وائی نیوز کے پروگرام باخبر سویرا میں شیف سارہ فرحان نے خواتین کو ان پکوانوں سے متعلق آگاہ کیا جو سحری کے وقت آسانی سے اور جلدی تیار ہوجائیں۔
انہوں نے بتایا کہ سحری کی غذا میں کاربو ہائیڈریٹ لینا ضروری ہے، اس کیلیے چکی کے آٹے کی روٹی سب سے بہترین ہے، انڈہ فرائی بھی لیا جا سکتا ہے۔
اس کے علاوہ ضروری غذاؤں میں دہی بھی بہت اہمیت کی حامل ہے۔ ساتھ ہی اگر کچی لسی یا دہی کا پانی پی لیا جائے تو اس سے بہتر کچھ نہیں ہوسکتا۔
سحری میں دہی کو شامل کرنے سے غذا متوازن ہوتی ہے اور معدے کی تیزابیت کا امکان بھی کم ہوتا ہے۔ دہی میں پانی کی مقدار کافی زیادہ ہوتی ہے اس لیے یہ روزے کے دوران ڈی ہائیڈریشن کا امکان بھی کم کرتی ہے۔
ان کا کہنا تھا کہ میٹھے شربتوں اور چینی سے بنی اشیاء سے پرہیز بہت ضروری ہے تاہم اگر میٹھا کھانے کا بہت دل چاہ رہا ہے تو بہت تھوڑی سی مقدار میں براؤن شوگر یا گڑ کھا لیں اس کے علاوہ کھجور تو سب کھاتے ہی ہیں۔
میٹھے کیلیے اسموتھی بنائیں جس میں دودھ دہی کیلا اور دو کھجور شامل کریں اور پی جائیں اس سے آپ کا پورا دن بہت آرام سے گزرے گا۔ افطار کے وقت مسالحے دار اشیاء بھی کم سے کم کھائیں اور پانی وقفے وقفے سے پئیں۔
اس کے علاوہ سحری میں تیز مرچوں، نمک اور چینی کا کم از کم استعمال کریں کیونکہ ان کے زیادہ استعمال سے دن بھر پیاس زیادہ محسوس ہوگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
