اسلام آباد: ملک میں دفاعی پیداواری صلاحیت کے موضوع پر سیمینار میں مقررین نے کہا کہ پاکستان کو اپنی دفاعی پیداواری صلاحیت سے بھرپور فائدہ اٹھانے کی ضرورت ہے، اسٹیبلشمنٹ کو نجی شعبے کے لیے سازگار ماحول پیدا کرنا چاہیئے۔
تفصیلات کے مطابق پاکستان میں دفاعی پیداواری صلاحیت کے موضوع پر سیمینار منعقد ہوا، سیمینار میں سابق چیئرمین جوائنٹ چیف آف اسٹاف کمیٹی جنرل زبیر محمود حیات، وائس ایڈمرل (ر) افتخار احمد راؤ اور ایم ڈی کراچی شپ یارڈ ایئر وائس مارشل (ر) اسد اکرام نے خطاب کیا۔
مقررین کا کہنا تھا کہ دفاعی پیداوار کے لیے اسٹیبلشمنٹ کو نجی شعبے کے لیے سازگار ماحول پیدا کرنا چاہیئے، دفاعی پیداوار کے لیے سرکاری انتظامی ماڈل کو بہتر بنانے اور تبدیل کرنے کی ضرورت ہے۔
مقررین کے مطابق پبلک سیکٹر، پرائیوٹ سیکٹر کو سپورٹ کر کے تحقیق و ترقی اور پیداوار کی منتقلی کو فروغ دے، تحقیق و ترقی کے فروغ کے لیے پرائیوٹ سیکٹر کی مالی معاونت کرنی چاہیئے۔
خطاب میں کہا گیا کہ پاکستان کو اپنی دفاعی پیداواری صلاحیت سے بھرپور فائدہ اٹھانے کی ضرورت ہے، تعلیم اور معیاری تحقیق و ترقی، انسانی صلاحیت کے شعبوں میں ترقی اور پیش رفت کا باعث ہے، صنعتکاری، ٹیکنالوجی، اکیڈمی و انڈسٹری میں روابط نجی شعبے کو ترقی کا ماحول فراہم کرتے ہیں۔
