واشنگٹن : امریکی سینیٹ میں صدرٹرمپ کےمواخذے کےلئےمزید گواہوں کوطلب کرنے کی قراردادمسترد کردی گئی ، آخری بحث پیرکوہونے کا امکان ہے۔
تفصیلات کے مطابق : امریکی سینیٹ میں صدرٹرمپ کےمواخذے کی کارروائی جاری ہے ، صدرٹرمپ کےمواخذے کےلئےمزید گواہوں کوطلب کرنے کی قراردادمسترد کردی گئی، قراردادکی مخالفت میں اکیاون اورحمایت میں انچاس ووٹ ڈالے گئے۔
سینٹ میں صدرٹرمپ کے مواخذے پرآخری بحث پیرکوہونے کا امکان ہے۔
یاد رہے امریکی صدر ڈونلڈ ٹرمپ کے سابق سیکورٹی ایڈوائزر جان بولٹن نے مواخذے کے دوران اہم راز افشا کرتے ہوئے بتایا تھا کہ ٹرمپ نے یوکرین کی امداد جوبائڈن کے خلاف تحقیقات سے مشروط کی تھیں۔
امریکی صدر ٹرمپ نے جواب میں ٹویٹ کرتے ہوئے کہا تھا کہ میں نے جان بولٹن سے یوکرینی امداد ڈیموکریٹس کے خلاف تحقیقات سے مشروط کرنے کی کوئی بات نہیں کی، جان بولٹن اپنی کتاب بیچنے کی کوشش کر رہا ہے، میری یوکرین کے ہم منصب سے گفتگو تحریری شکل میں موجود ہے۔
مزید پڑھیں : ٹرمپ کے سابق سیکورٹی ایڈوائزر جان بولٹن نے راز افشا کر دیا
خیال رہے امریکی سینٹ میں صدر کی ری پبلک پارٹی کی اکثریت ہونے کے باعث مواخذے کی تحریک کامیاب ہونے کا امکان کم ہے۔
واضح رہے ڈیموکریٹ پارٹی نے اختیارات کے ناجائز استعمال اورسیاسی فائدےکے لئے یوکرین پردباؤ ڈالنےکےالزامات پرصدرٹرمپ کےمواخذے کی تحریک شروع کی تھی۔ ایوان نمائندگان نے مواخذے کی کارروائی کی منظوری دے دی تھی۔
امریکی صدر ڈونلڈ ٹرمپ کے مواخذے کے سلسلے میں ایوان نمائندگان کی عدلیہ کمیٹی نے ٹرمپ پر دو الزامات عائد کیے تھے ، جس میں سیاسی مخالف کی تفتیش کے لیے یوکرین پر دباﺅ ڈالنے کی کوشش کرکے اختیارات کا غلط استعمال کیا، جو ملک سے دھوکا دہی ہے۔
ڈیموکریٹس نے دوسرا الزام عائد کرتے ہوئے کہا تھا کہ اسکینڈل کے حوالے سے ہونے والی کانگریس کی تفتیش میں رکاوٹیں کھڑی کیں۔
