بیجنگ: وزیر خارجہ پاکستان شاہ محمودقریشی نے چینی ہم منصب وانگ ژی سے ملاقات کی.
تفصیلات کے مطابق آج بیجنگ میں وزیر خارجہ پاکستان کی چین کے وزیر خارجہ مسٹر وانگ ژی سے ملاقات ہوئی، دونوں وزرائے خارجہ کے مابین خطےمیں امن و امان کی صورت حال پر گفتگو ہوئی.
ملاقات میں کثیرالجہتی امور میں دوطرفہ تعاون پر تبادلہ خیال ہوا، پاک چین تعلقات، سی پیک، خطے کی سیکیورٹی، افغان امن عمل پر بات چیت ہوئی.
اس موقع پر شاہ محمود قریشی نے کہا کہ پاک چین دوستی ہماری خارجہ پالیسی کا اہم ستون ہے، دونوں ممالک خطے میں تعمیروترقی کے ایجنڈے پرعمل پیرا ہیں. وزیر خارجہ پاکستان نے کہا کہ موجودہ صورتحال میں وزیر اعظم کا دورہ چین اہمیت کا حامل ہے.
خیال رہے کہ چین کے دورے سے قبل پاکستانی وزیر خارجہ نے جاپان کا دورہ کیا تھا، جہاں انھوں نے جاپانی وزیر خارجہ سمیت اہم ملاقاتیں کیں.
مزید پڑھیں: وزیر خارجہ شاہ محمود قریشی کی جاپانی کمپنیوں کو پاکستان میں سرمایہ کاری کی دعوت
ٹوکیو میں چیئرمین جاپان پاکستان بزنس کوآپریشن کمیٹی کی طرف سے وزیر خارجہ مخدوم شاہ محمود قریشی کے اعزاز میں ظہرانہ دیا.
اس موقع پر پاکستانی وزیر خارجہ نے جاپانی کمپنیوں کو پاکستان میں سرمایہ کاری کی دعوت دیتے ہوئے کہا کہ حکومت امن و استحکام، تعمیر و ترقی اور عوامی بہبود کو پیش نظر رکھتے ہوئے اقتصادی ترقی کے ایجنڈے پر عمل پیرا ہے۔
