اسلام آباد: وزیرِ خارجہ شاہ محمود قریشی نے سعودی وزیرِ اطلاعات سے ملاقات کرتے ہوئے سعودی سرمایہ کاروں کو پاکستان میں سرمایہ کاری کی دعوت دے دی۔
تفصیلات کے مطابق شاہ محمود قریشی نے سعودی وزیرِ اطلاعات کے ساتھ اسلام آباد میں ملاقات کی، ملاقات میں دونوں ممالک کی طرف سے معاشی تعاون کو فروغ دینے پر زور دیا گیا۔
ملاقات میں سعودی وزیرِ ثقافت و اطلاعات ڈاکٹر عواد بن صالح العواد نے کہا سعودی حکومت پاکستان کی نئی حکومت کے ساتھ مل کر کام کرنے کی خواہش مند ہے۔
وزیرِ خارجہ شاہ محمود قریشی نے سعودی قیادت کی خواہشات کا خیرِ مقدم کرتے ہوئے کہا کہ ہم چاہتے ہیں کہ سعودی سرمایہ کار آ کر یہاں سرمایہ کاری کریں۔
مزید پڑھیں: سعودی وزیراطلاعات ڈاکٹر عواد بن صالح پاکستان پہنچ گئے
ترجمان دفترِ خارجہ کے مطابق دونوں ممالک نے معاشی تعاون کو فروغ دینے پر زور دیا، دونوں ممالک کے رہنماؤں نے باہمی روابط بڑھانے پر بھی اتفاق کیا۔
خیال رہے کہ سعودی وزیرِ اطلاعات جمعے کو پاکستان کے سرکاری دورے پر آئے ہیں، ان کا استقبال نور خان ایئر بیس پر وفاقی وزیرِ اطلاعات فواد چوہدری نے کیا تھا۔ ڈاکٹر عواد بن صالح وزیرِ اعظم عمران خان کو سعودی فرمانروا شاہ سلمان کا خصوصی پیغام دیں گے۔
سعودی وفد میں سعودی عرب کے سفیر نواف المالکی، سعودی وزیر اطلاعات کے مشیر بھی شامل ہیں، دورے کا مقصد دونوں ممالک کے درمیان باہمی تعاون کی نئی راہیں تلاش کرنا ہے۔
