ممبئی: بالی ووڈ سُپر اسٹار شاہ رخ خان کی فلم ’ڈنکی‘ نے ریلیز ہوتے ہی دھوم مچا دی ہے، سینما گھروں کے باہر مداحوں کا رش لگ گیا۔
بالی وڈ سپر اسٹار شاہ رخ خان کی اس سال کی تیسری فلم ’ڈنکی‘ سنیما میں ریلیز کردی گئی، سنیما گھروں میں ہاؤس فل ہوگیا لوگوں کو ٹکٹ کے حصول کے لیے رش لگ گیا، شائقین نے ڈنکی کو بہترین فلم قرار دیدیا۔
بھارتی میڈی کے مطابق فلمی تجزیہ کاروں کا کہنا ہے کہ ’ڈنکی‘ ریلیز کے پہلے دن 30 سے 35 کروڑ روپے تک کا بزنس کرسکتی ہے جبکہ اس فلم کا بجٹ صرف 120 کروڑ بتایا جا رہا ہے۔
کیا فلم ”ڈنکی“ کی شوٹنگ سعودی عرب میں کی گئی؟
راج کمار ہیرانی کی ہدایتکاری میں بننے والی فلم ’ڈنکی‘ کو شاہ رخ خان کی اہلیہ گوری خان نے پروڈیوس کیا ہے جبکہ اس فلم میں شاہ رخ خان کے علاوہ تاپسی پنو، وکی کوشل اور بومن ایرانی سمیت دیگر اداکاروں نے اہم کردار ادا کیے ہیں۔
فلم ’ڈنکی‘ کی کہانی چار دوستوں کے گرد گھومتی ہے جو غیرقانونی طور پر بیرون ملک سفر کرتے ہیں، ’ڈنکی‘ محبت اور دوستی کی ایک ایسی کہانی ہے جسے جذباتی کہانی اور کامیڈی مناظر کے ساتھ لوگوں کے سامنے پیش کیا گیا ہے۔