پاکستان کرکٹ ٹیم کے فاسٹ بولر شاہین شاہ آفریدی نے عمرے کی سعادت حاصل کرلی ہے جس کی تصویر انہوں نے سوشل میڈیا پر شیئر کی ہے۔
اے آر وائی نیوز کے مطابق قومی کرکٹ ٹیم کے فاسٹ بولر جو انجری کے باعث کئی ماہ سے کرکٹ سے دور ہیں اور آئندہ ماہ پی ایس ایل سے وہ ایک بار پر کرکٹ کے میدانوں میں اپنی صلاحیتوں کے جوہر دکھانے کے لیے تیار ہیں۔
پی ایس ایل سے قبل شاہین شاہ آفریدی نے حجاز مقدس پہنچ کر عمرے کی سعادت حاصل کی ہے اور اس کی ایک سحر انگیز تصویر بھی سماجی رابطوں کی ویب سائٹ ٹوئٹر پر اپنے اکاؤنٹ پر پوسٹ کی ہے۔
شاہین شاہ نے مسجد الحرام کے مطاف میں خانہ کعبہ کے پس منظر کے ساتھ اس خوبصورت تصویر کو الحمدللہ کے کیپشن کے ساتھ شیئر کیا ہے۔
یہ بھی پڑھیں: سرفراز کی بیٹے کے ہمراہ مدینے کی گلیوں میں نعت پڑھنے کی ویڈیو وائرل
سوشل میڈیا پر یہ تصویر دیکھتے ہی دیکھتے وائرل ہوگئی۔ صرف چند گھنٹوں میں اب تک لاکھوں صارفین اس کو دیکھ پر لائیک کرچکے اور ان کی جانب سے پیسر کو مبارکباد دینے کا سلسلہ بھی جاری ہے۔
Alhamdulillah 🤲 pic.twitter.com/Uwx8mgqFxW
— Shaheen Shah Afridi (@iShaheenAfridi) January 22, 2023
یاد رہے کہ آئندہ ماہ پی ایس ایل میں اپنی کارکردگی کے جوہر دکھانے سے قبل شاہین شاہ آفریدی زندگی کی نئی اننگ بھی شروع کر رہے ہیں۔
شاہین شاہ آفریدی کا 3 فروری کو سابق کپتان شاہد آفریدی کی بیٹی انشا آفریدی سے نکاح طے ہے جو کراچی میں ایک مختصر اور پروقار تقریب میں انجام پائے گا۔