پانچ ٹی 20 میچوں پر مشتمل سیریز کے کرائسٹ چرچ میں کھیلے گئے چوتھے میچ میں میزبان نیوزی لینڈ نے پاکستان کو سات وکٹوں سے شکست دے دی۔
پاکستان اور نیوزی لینڈ کے درمیان پانچ ٹی 20 میچوں پر مشتمل سیریز کے چوتھے میچ میں بھی پاکستان کی بیٹنگ اور بولنگ کا شو فلاپ ہو گیا، پہلے بیٹر بڑا ہدف دینے میں ناکام رہے پھر بولرز کیوی بلے بازوں کو رنز بنانے سے نہ روک سکے۔
یوں میزبان ٹیم نے مسلسل چوتھی فتح کے ساتھ پانچ ٹی ٹوئنٹی میچوں کی سیریز میں چار صفر کی برتری حاصل کر لی۔
پاکستان کی جانب سے دیے گئے 159 رنز کے ہدف کے تعاقب میں شاہین شاہ آفریدی نے ابتدا ہی میں تین کھلاڑیوں کو آؤٹ کر کے جیت کے چراغ روشن کیے، اسٹار پیسر نے پہلے اوور میں دو وکٹیں اڑائیں تو اسٹینڈ میں بیٹھی دو لڑکیوں نے شادی کا پیغام لکھا اور پلے کارڈ اُٹھادیا۔
لڑکیوں کی جانب سے اُٹھائے گئے پلے کارڈ پر تحریر تھا ”مجھ سے شادی کرو گے“۔۔ معاملہ سامنے آنے کے بعد سوشل میڈیا پر ایک نیا طوفان برپا ہوگیا ہے۔ اس حوالے سے تاحال قومی ٹیم کے کپتان کی جانب سے کوئی رد عمل سامنے نہیں آیا ہے۔
نیوزی لینڈ کی پاکستان کے خلاف مسلسل چوتھی فتح
واضح رہے کہ آج کے میچ میں پاکستان کی جانب سے شاہین شاہ آفریدی سب سے کامیاب بولر رہے جنہوں نے 34 رنز دے کر تین وکٹیں حاصل کیں۔ ان کے علاوہ کوئی بولر کیوی بیٹرز کا کچھ نہ بگاڑ سکا۔
