اسلام آباد : عوامی نیشنل پارٹی کے مرکزی رہنما اور سینیٹر شاہی سید نے کہا ہے کہ شراب پینے والے کو پھانسی کے پھندے پر لٹکا دیا جائے جبکہ چرس تو درویشی نشہ ہے، پھر بھی نہیں ہونا چاہیے۔
تفصیلات کے مطابق شاہی سید نے نشے میں حلال اور حرام کا فرق بتادیا، ان کا کہنا ہے کہ شراب پینے والے سیاستدانوں کو سزائے موت دی جائے، یہ بات انہوں نے سینیٹر رحمان ملک کی زیر صدارت سینیٹ کی قائمہ کمیٹی برائے داخلہ کے اجلاس میں اظہار خیال کرتے ہوئے کہی۔
اجلاس کے دوران مقامی اور غیر ملکی شراب کے تذکرے بھی ہوئے۔ شاہی سید نے کہا کہ شراب کا پرمٹ ہندوؤں کے نام پر ہوتا ہے لیکن کام مسلمان کرتا ہے شراب کے معاملے پر کسی بڑے آدمی کو سزا نہیں ملتی صرف غریب ہی کی گردن پکڑی جاتی ہے۔
انہوں نے کہا کہ پارلیمنٹرین عوام کا سمبل ہیں اور اگر وہ غلط کام کریں تو ان کیلئے بھی سزا ہونی چاہئے۔ ایک صحافی کے سوال پر کہ چرس کے بارے میں آپ کا کیا خیال ہے؟ تو اے این پی کے رہنما نے انوکھی منطق پیش کرتے ہوئے کہا کہ چرس تو درویشوں کا نشہ ہے لیکن یہ بھی نہیں ہونا چاہیئے۔
