شاہد کپور کے مداح پرجوش تھے کہ اداکار انیس بزمی جیسے ہدایت کار کے ساتھ فلم کرنے جارہے ہیں تاہم تخلیقی اختلافات سامنے آنے کے بعد شاہد نے خود کو پروجیکٹ سے علیحدہ کرلیا ہے۔
بالی وڈ کے دو بڑے ناموں کے درمیان سامنے آنے والے اختلافات کے بعد انیس بزمی کا کہنا تھا کہ وہ پچھلی اسکرپٹ کے ساتھ ہی اس پروجیکٹ کو مکمل کریں گے لیکن اس بار اداکار مختلف ہوگا کیوں کہ شاہد اب ان کی ٹیم کا حصہ نہیں ہیں۔
انیس نے فلمی ویب سائٹ کو انٹرویو دیتے ہوئے انکشاف کیا کہ میں شاہد کپور کے ساتھ فلم نہیں کررہا ہوں، ہمارا اسکرپٹ پہلے جیسا ہی رہے گا تاہم ہمیں نئے اداکار کی تلاش ہے۔
انھوں نے کہا کہ میں اپنی آئندہ فلم کی شوٹنگ ختم ہونے کے بعد اس پروجیکٹ پر دوبارہ سے کام کا آغاز کروں گا کیوں کہ یہ ایک بہت عمدہ اسکرپٹ ہے۔
اس وقت مجھے شاہد کے ساتھ کی جانے والی فلم کے حوالے سے پریشان ہونے کی ضرورت نہیں ہے کیونکہ میری توجہ بھول بھلیاں تھری کی جانب مرکوز ہے۔ میں اس فلم کی شوٹنگ کا آغاز اگلے سال کروں گا۔
شائقین کے لیے یہ بات دلچسپی کی حامل ہوگی کہ انیس بزمی نے پچھلی فلم کی کاسٹ کے ساتھ دوبارہ سے فلم نو انٹری بنانے کا اعلان کیا ہے جس میں سلمان خان، انیل کپور اور فردین خان تینوں ہی اداکار شامل ہوں گے۔
واضح رہے کہ معروف ڈائریکٹر ویلکم، نو انٹری، بھول بھلیاں ٹو سمیت کئی دیگر مشہور فلموں کی ہدایت کاری کے فرائض انجام دے چکے ہیں۔
