آئی سی سی نے ورلڈ کپ 2023 کی ٹرافی بھارتی سپر اسٹار شاہ رخ خان کے ساتھ جاری کر دی ہے جس کو شائقین کرکٹ اور اداکار کے فینز میں پذیرائی مل رہی ہے۔
آئی سی سی کا ایک روزہ عالمی کپ رواں برس اکتوبر نومبر میں بھارت میں ہو رہا ہے۔ انٹرنیشنل کرکٹ کونسل نے میگا ایونٹ کی اس ٹرافی کو بھارت کے ہی میگا اسٹار شاہ رخ خان کے ساتھ جاری کر دیا ہے۔
شاہ رخ خان اور عالمی کپ کی ٹرافی کی تصویر کو آئی سی سی کی ٹوئٹر آفیشل ویب سائٹ پر جاری کیا گیا جس پر کیپشن لکھا ہے کہ یہ تقریباً یہاں ہے۔
King Khan 🤝 #CWC23 Trophy
It’s nearly here … pic.twitter.com/TK55V3VkfA
— ICC (@ICC) July 19, 2023
شاہ رخ خان کے ساتھ اس تصویر کو نہ صرف شائقین کرکٹ سراہ رہے ہیں بلکہ اداکار کے چاہنے والوں میں بھی اس کو پذیرائی مل رہی ہے اور سوشل میڈیا پر صارفین اندازہ لگا رہے ہیں کہ امکان ہے کہ اس مرتبہ شاہ رخ خان ورلڈ کپ ٹرافی کی رونمائی کریں گے۔
دوسری جانب کرکٹ کے سب سے بڑے ایونٹ کی ٹرافی اور بالی ووڈ کی بھی بڑی قد آور شخصیت کی تصویر پر مداح دلچسپ تبصرے کر رہے ہیں۔
یاد رہے کہ ایک روزہ کرکٹ کا سب سے بڑا عالمی میلہ 5 اکتوبر سے بھارت میں شیڈول ہے۔ میگا ایونٹ میں پاکستان سمیت دنیا کے 10 ممالک کی ٹیمیں شرکت کر رہی ہیں۔
ایونٹ کا سب سے بڑا میچ روایتی حریفوں کے درمیان پاک بھارت ٹاکرا ہے جو 15 اکتوبر کو احمد آباد کے نریندر مودی اسٹیڈیم میں شیڈول ہے تاہم پاکستان کی ورلڈ کپ میں شرکت حکومتی اجازت سے مشروط ہے۔
