کراچی : ماضی کے معروف ٹی وی اداکار شکیل نے بتایا ہے کہ وہ کس طرح شوبز کی فیلڈ میں آئے اور ان کا ٹیلی وژن سے تعلق کس طرح شروع ہوا۔
ٹیلی ویژن پر شوخ اور سنجیدہ کرداروں کے لحاظ سے اداکار شکیل جن کا پورا نام شکیل یوسف ہے شعبہ اداکاری میں ایک منفرد مقام رکھتے ہیں، ان کی بے ساختہ اور برجستہ اداکاری نے ٹی وی ڈراموں کو سپرہٹ بنانے میں اہم کردار ادا کیا۔
ٹی وی ڈراموں کو اپنی شاندار اداکاری سے بام عروج پر پہچانے والے پاکستان شوبز کے معروف اور سینئر اداکار شکیل نے اے آر وائی ڈیجیٹل کے پروگرام گڈ مارننگ پاکستان میں شرکت کی اور اپنی زندگی میں پیش آنے والے حالات و واقعات سے ناظرین کو آگاہ کیا۔
پروگرام کی میزبان ندا یاسر کی جانب سے پوچھے گئے ایک سوال پر کہ ٹی وی پر پہلی بار کیسے آئے یا اس کی شروعات کیسے ہوئی؟ جس کے جواب میں انہوں نے بتایا کہ مجھے اداکاری کا کوئی شوق نہیں تھا بلکہ جب پہلی بار آفر ہوئی تھی تو منع کردیا تھا۔
شکیل نے کہا میں اپنی والدہ کے ساتھ ایک تقریب میں گیا تھا وہاں پر اس زمانے کے ایک مشہور فلم ڈائریکٹر ایس ایم یوسف بھی موجود تھے، تو انہوں نے مجھ سے پوچھا کہ فلم میں کام کرو گے؟ تو میں نے فوراً ہی منع کردیا کیونکہ اس زمانے میں فلموں میں کام کرنا اچھا نہیں سمجھا جاتا تھا۔
جس کے بعد مجھے انہوں نے تھیٹر میں کام کرتے ہوئے دیکھا تو کافی دن بعد دوبارہ فلم کی آفر کی، اداکار شکیل نے بتایا کہ میں نے اس شرط پر فلموں میں کام کیا کہ میں دن میں اپنی ملازمت کروں گا اور رات کو فلم میں کام، تو یہ میری ابتدا تھی۔
