ممبئی: بھارتی بد نام زمانہ اینکر ارنب گوسوامی کی لیک چیٹس کے معاملے پر لوک سبھا میں انڈین نیشنل کانگریس کے رکن ششی تھرور نے تحقیقات کا مطالبہ کر دیا۔
تفصیلات کے مطابق بھارتی بدنام زمانہ اینکر ارنب گوسوامی کی لیک چیٹس پر انڈین نیشنل کانگریس کے لوک سبھا کے رکن ششی تھرور نے تحقیقات کا مطالبہ کرتے ہوئے کہا ہے کہ لیک چیٹس میں 3 قابل مذمت معاملات کا انکشاف ہوا۔
انھوں نے کہا فوجی راز کاروباری مقاصد کے لیے ایک ٹی وی چینل کو لیک کرنے پر انتہائی سنجیدہ تحقیقات بہت ضروری ہیں، ششی تھرور نے مطالبہ کیا کہ تحقیق کی جائے کہ کیسے ایک قوم پرست چالیس جوانوں کی ہلاکت پر کہتا ہے ’ہم پاگلوں کی طرح جیت گئے۔‘
ششی تھرور نے مطالبے میں کہا کہ تحقیقات کی جائیں کہ کس طرح ٹی آر پیز کے جعلی جوڑ توڑ کے لیے دھوکا دہی کی گئی۔
گوسوامی کے کرتوتوں نے بھارتی قومی سلامتی کے ادارے کی عزت بھی ڈبو دی، چیٹ نے کئی راز فاش کر دیے
دریں اثنا، بھارت کے بدنام زمانہ اینکر ارنب گوسوامی کے خلاف آج ممبئی میں اپوزیشن جماعت کانگریس کی جانب سے احتجاج کیا گیا، جس میں لوگوں کی بڑی تعداد شریک ہوئی۔
ادھر بھارت کی خطے میں بدامنی پھیلانے کی ایک اور سازش بے نقاب ہوئی ہے، افغان امن عمل سبوتاژ کرنے کے لیے گریٹ ڈبل گیم کا پردہ چاک ہو گیا ہے، کنگز کالج لندن کے استاد اوی ناش پلوال کی کتاب مائی اینیمیز اینیمی نے بھانڈا پھوڑ دیا۔
کتاب میں لکھا گیا ہے کہ بھارت نے پاکستان میں مداخلت، اور جموں و کشمیر میں دہشت گرد گروپس کو کھڑا کرنے کی کوشش کی، بلوچستان اور خیبر پختون خوا میں عدم استحکام پیدا کرنے کی چال چلی گئی، افغان طالبان کو جال میں پھانسنے کی کوششوں کا بھی کتاب میں ذکر کیا گیا، کتاب میں ’بلوچ اینڈ پشتون کارڈ‘ کا پورا ایک باب شامل کیا گیا ہے۔
