لندن: مسلم لیگ ن کے صدر و سابق وزیراعظم شہباز شریف کا کہنا ہے کہ نواز شریف نوجوانوں میں گھولا گیا زہر ختم کرنے آرہے ہیں۔
اے آر وائی نیوز کے مطابق مسلم لیگ ن کے صدر شہباز شریف نے لندن میں میڈیا سے گفتگو کرتے ہوئے کہا کہ نواز شریف نے کبھی قوم سے غلط بات اور جھوٹے وعدے نہیں کیے، وہ معمار بن کر آرہے ہیں، ترقی کے سفر کو وہیں سے شروع کریں گے جہاں رک گیا تھا۔
انہوں نے کہا کہ پی ٹی آئی دور میں نوجوانوں میں زہر گھولا گیا اور افرا تفری پیدا کی گئی، نواز شریف نوجوانوں میں گھولا گیا زہر ختم کرنے آرہے ہیں۔
شہباز شریف نے کہا ک نواز شریف نے کہا تھا قوم موقع دے گی تو اندھیرے ختم کروں گا، 2013 میں حکومت ملی تو پاکستان میں اندھیرے ختم کیے گئے، لاکھوں لوگوں کو روزگار ملا، ملک میں اربوں ڈالرز کی سرمایہ کاری ہوئی۔
سابق وزیراعظم نے کہا کہ 2018 میں قوم کے ساتھ مذاق کیا گیا، ترقی روک دی گئی، پاکستانی قوم کے ترقی کے سفر کو جھرلو الیکشن سے روکا گیا تھا، نواز شریف کو اقتدار سے نہیں قوم کو ترقی سے محروم کیا گیا تھا۔
انہوں نے کہا کہ نواز شریف قوم کی ترقی کے سفر کو دوبارہ شروع کرنے کے لیے پاکستان آرہے ہیں۔
