ابوظہبی: متحدہ عرب امارات کی مسلح افواج کے نائب سربراہ اور ابوظہبی کے ولی عہد شہزادہ شیخ محمد بن زید النہیان نے اپنے پاکستان دورے کی ہائی لائٹس انسٹا گرام پر پوسٹ کردیں۔
تفصیلات کے مطابق ابوظہبی کے ولی عہد شہزادہ شیخ محمد بن زید النہیان نے اتوار کو پاکستان کا باضابطہ دورہ کیا تھا ، اور اس دورے کی خصوصی جھلکیا ں انہوں نےسماجی رابطے کی ویب سائٹ انسٹا گرام پر پوسٹ کی ہیں۔ ویڈیو میں انہیں دیے جانے والے پروٹوکول اور ان کی مصروفیات کو دیکھا جاسکتا ہے۔
یا درہے کہ شیخ محمد نے اعلیٰ سطحی وفد کے ساتھ پاکستان کا دورہ کیا تھا ، اس موقع پر پاکستان وزیر اعظم عمران نے ان کا استقبال کیا تھا۔
View this post on Instagram
اس موقع پر حکومتِ پاکستان کی جانب سے جاری کردہ اعلامیے میں کہا گیا تھا کہ وزیراعظم عمران خان کی دعوت پر ولی عہد محمد بن زید النیہان نے12سال بعد پاکستان کا دورہ کیا۔، وزیراعظم عمران خان نے ولی عہد کی وزیراعظم ہاؤس میں مہمان نوازی کی، دونوں رہنماؤں میں ون آن ون ملاقات میں باہمی دلچسپی، علاقائی، خطے کے امن اور عالمی امور پر تبادلہ خیال کیا گیا۔
ملاقات میں دونوں ممالک کے تعلقات مزید مستحکم کرنے کےعزم کا اعادہ کیا، دونوں رہنماؤں کی جانب سے ہرقسم کی دہشت گردی کی مذمت کی گئی، دہشت گردی کے خاتمے کے لئے مشترکہ کوششوں پر اتفاق کیا گیا، ولی عہد نے دہشت گردی کے خلاف پاکستان کی قربانیوں اور کوششوں کی تعریف کی۔
ملاقات میں وزیراعظم نے پاکستان میں سماجی اور اقتصادی ترقی کیلئے یو اے ای کی مدد پر شکریہ ادا کرتے ہوئے پاکستان میں انسداد پولیو کے خاتمے کیلئے حمایت پر ولی عہد سے اظہار تشکر کیا، اس کے علاوہ وزیراعظم عمران خان نے اماراتی قیادت کو اصلاحاتی ایجنڈے اور احتساب، شفافیت کے لیے اٹھائے اقدامات سے آگاہ کیا۔
اعلامیہ میں کہا گیا ہے کہ دونوں ممالک میں طویل المدتی سرمایہ کاری فریم ورک پراتفاق اور دونوں ممالک کے درمیان تجارت بڑھانے کیلئے ٹاسک فورس کے قیام کا فیصلہ کیا گیا ہے، یو اے ای پاکستان کو بیلنس آف پیمنٹ کے لئے3ارب ڈالر دے گا، وزیراعظم عمران خان نے3ارب روپے کی امداد پر ولی عہد کا شکریہ ادا کیا۔
