لاہور: تحریک انصاف کے چیئرمین عمران خان سے عوامی مسلم لیگ کے سربراہ شیخ رشید نے ملاقات کی اور انہیں طاہر القادری کے دھرنے میں شرکت کی دعوت دی جس پر عمران خان نے معذرت کرلی، دونوں رہنماؤں نے عید کے بعد حکومت مخالف تحریک چلانے پر اتفاق کیا۔
بنی گالا میں ہونے والی ملاقات کے بعد صحافیوں سے گفت گو کرتے ہوئے شیخ رشید کا کہنا تھا کہ عمران خان سے ملاقات ہوئی ہے اور انہیں طاہر القادری کے دھرنے میں شرکت کی دعوت دی ہے تاہم عمران خان طاہر القادری کے دھرنے میں شرکت نہیں کررہے البتہ میں دھرنے میں شرکت ضرور کروں گا۔
شیخ رشید نے مزید کہا کہ عمران خان سے ملاقات میں ٹی او آرز کمیٹی کے ڈیڈ لاک پر بھی بات ہوئی ہے۔عوامی مسلم لیگ کے سربراہ کا پانامہ لیکس کے معاملے پر کہنا تھا کہ حکومت کبھی بھی وزیراعظم اور اہل خانہ سے متعلق تحقیقات نہیں کرے گی۔
دریں اثنا ملاقات میں دونوں رہنماؤں کے درمیان عید کے بعد حکومت مخالف تحریک چلانے پر اتفاق کیا گیا۔
واضح رہے کہ طاہر القادری نے سانحہ ماڈل ٹائون کی برسی پر حکومت کے خلاف دھرنے کے اعلان کیا ہے۔