عوامی مسلم لیگ کے سربراہ شیخ رشید نے کہا ہے کہ وزیراعظم کا اقوام متحدہ میں خطاب بہانا ہے، اصل میں نواز شریف کو منانا ہے۔
شیخ رشید نے وزیراعظم شہباز شریف کے آئندہ ہفتے لندن اور امریکا کے دوروں سے متعلق سماجی رابطوں کی ویب سائٹ ٹوئٹر پر اپنے ردعمل کا اظہار کیا ہے۔
سابق وفاقی وزیر نے اپنے ٹوئٹ میں لکھا ہے کہ اقوام متحدہ میں شہباز شریف کے خطاب کا بہانہ ہے اصل مقصد نواز شریف کو منانا ہے۔
انہوں نے ایک بار پھر دعویٰ کیا کہ ن اور ش کی سیاست آر پار ہو جائے گی اور پی ڈی ایم الیکشن سے پہلے ٹوٹ جائے گی۔
شیخ رشید کا کہنا تھا کہ مفتاح کے رونے سے معیشت ٹھیک نہیں ہوگی، سیلاب زدہ علاقوں سے 2 ماہ تک پانی کی نکاسی نہ کی گئی تو گندم، کپاس اور گنے کی بوائی نہیں ہو پائےگی، پھر کسان کیا کرے گا؟ غذائی بحران پیدا ہوگا۔
سربراہ عوامی مسلم لیگ کا ایک اور ٹوئٹ میں کہنا تھا کہ گندم کی امدادی قیمت 2 ہزار سے بڑھا کر 4 ہزار روپے من مقرر کرنا غریب کو گھاس کھانے پر مجبور کرنا ہے، سردیوں سے پہلے ہی گیس کی قلت شروع ہو گئی ہے۔
مفتاح کے رونے سے معیشت ٹھیک نہیں ہوگی۔UNکا خطاب ایک بہانہ ہے،اصل میں نواز شریف کومنانا ہے۔ن اورش کی سیاست آرپار ہو جائےگی اورPDMالیکشن سے پہلےٹوٹ جائے گی۔اگر 2مہینوں تک سیلابی پانی نہیں نکالا تو گندم،کپاس اورگنے کی بوائی نہیں ہوپائےگی،پھر کسان کیا کرےگااورغذائی بحران پیدا ہوگا
— Sheikh Rashid Ahmed (@ShkhRasheed) September 12, 2022
انہوں نے کہا کہ سیلاب متاثرین کیلیے کوئی غیر ملکی امداد ملی نہ ملکی امداد کی ساکھ ہے، یو این سیکرٹری جنرل کو بھی چندے سے متعلق ایمانداری کی یقین دہانی کرائی جا رہی ہے۔
واضح رہے کہ وزیراعظم شہباز شریف 18 ستمبر کو لندن جائیں گے، اس دو روزہ دورے میں وہ سیاسی ملاقاتیں کریں گے اور ان کے لندن میں ملکہ برطانیہ کی آخری رسومات میں شرکت کا بھی امکان ہے۔
وزیراعظم لندن سے 19 ستمبر کی شام نیویارک پہنچیں گے، ذرائع کے مطابق وہ 23 ستمبر کو اقوام متحدہ کی جنرل اسمبلی سے خطاب کریں گے۔
