قومی ٹیم کے سابق اسپیڈ اسٹار شعیب اختر بھی ہنڈریڈ لیگ میں پک نہ کیے جانے پر بابر اعظم کی حمایت میں بول پڑے۔
سابق فاسٹ بولر شعیب اختر نے ٹوئٹر پر جیمز اینڈریسن کے بیان پر ٹوئٹ کرتے ہوئے دی ہنڈریڈ لیگ میں بابر اعظم کو منتخب نہ کیے جانے پر حیرانی کا اظہار کیا ہے۔
شعیب اختر نے لکھا کہ ’میں جیمز اینڈرسن سے متفق ہوں، میں بھی ایسا ہی کرتا میں واقعی حیران ہوں دنیا کے ٹی 20 کے بہترین کھلاڑی کو دی ہنڈریڈ لیگ میں کیوں نہیں لیا گیا۔
واضح رہے کہ گزشتہ دنوں ایک پوڈ کاسٹ میں گفتگو کرتے ہوئے انگلش فاسٹ بولر جیمز اینڈریسن کا کہنا تھا کہ بابر کو ہنڈریڈ لیگ میں پک نہ کیے جانے پر حیران ہوں۔
ان کا کہنا تھا کہ میں بابر اعظم کو ٹیم میں لینے کے لیے ڈبل پیسے آفر کردیتا اور اسے پک کرنے کے لیے اپنا پورا بجٹ لگا دیتا۔
I agree with @jimmy9 . I would have done the same. I really wonder why the best T20 player in the world went unsold at The Hundred. pic.twitter.com/giKMLdRRt0
— Shoaib Akhtar (@shoaib100mph) April 1, 2023
یاد رہے کہ دی ہنڈریڈ لیگ میں قومی ٹیم کے فاسٹ بولر شاہین آفریدی سب سے مہنگے کھلاڑی رہے ویلش فائر نے شاہین آفریدی کو ایک لاکھ پاؤنڈ میں پک کیا۔
فاسٹ بولر حارث رؤف بھی ساٹھ ہزار پاؤنڈ کے ساتھ ویلش فائر کا حصہ بن گئے۔
پی ایس ایل 8 میں شاندار بولنگ کرنے والے احسان اللہ کو بھی اوول انونسیبلز نے چالیس ہزار پاؤنڈ میں پک کیا جبکہ لیگ اسپنر شاداب خان کو ایک لاکھ پاؤنڈ میں برمنگھم فینکس نے ری ٹین کیا۔
ڈرافٹنگ میں پاکستان کرکٹ ٹیم کے کپتان بابر اعظم اور محمد رضوان کو کسی ٹیم نے پِک نہیں کیا تھا۔ خیال رہے کہ دی ہنڈرڈ لیگ کا آغاز یکم اگست سے ہوگا۔
