کراچی: برنس روڈ پر ایک لٹیرے نے دکان دار کو ہپناٹائز کر کے لوٹ لیا، پولیس نے خفیہ اطلاع پر ملزم عبدالشہاب کو گرفتار کر لیا ہے۔
تفصیلات کے مطابق کراچی کے علاقے آرام باغ کی پولیس نے ایک کارروائی میں ہپناٹائز کر کے لوٹ مار کرنے والے ملزم عبدالشہاب کو گرفتار کر لیا ہے، ملزم کی گرفتاری سی سی ٹی وی فوٹیج کی مدد سے عمل میں آئی۔
گرفتار نوسرباز نے برنس روڈ پر ایک دکان میں واردات کی تھی، اس واردات کی ویڈیو میں ملزم کو نظر بندی یا ہپناٹائز کرتے دیکھا جا سکتا ہے، ملزم نوسر بازی کر کے کاؤنٹر پر کھڑے شخص سے پیسے لے کر چلا گیا۔
سی سی ٹی وی فوٹیج میں ملزم کو دکان دار سے بات چیت کرتے دیکھا جا سکتا ہے، بات چیت کے دوران ملزم نے دکان دار کو ہپناٹائز کیا اور رقم لے کر فرار ہو گیا۔
سی سی ٹی وی فوٹیج سامنے آنے کے بعد پولیس نے ملزم کی تلاش شروع کر دی تھی، آرام باغ پولیس نے 24 گھنٹے کے اندر ملزم کو گرفتار کر لیا، پولیس حکام کا کہنا ہے کہ ملزم اس سے قبل بھی لوگوں کو ہپناٹائز کر کے فراڈ کر چکا ہے۔
ایس ایس پی ساؤتھ اسد رضا نے بتایا کہ گرفتار ملزم عبدالشہاب کے خلاف مقدمہ درج کر کے مزید تفتیش شروع کر دی گئی ہے، اس کا کریمنل ریکارڈ بھی چیک کیا جا رہا ہے۔
