اسلام آباد : اسلام آباد ہائی کورٹ کے حکم پر چیئرمین پی ٹی آئی عمران خان کو توہین عدالت کا شوکاز نوٹس جاری کردیا گیا۔
تفصیلات کے مطابق سابق وزیراعظم عمران خان کو خاتون جج کیخلاف بیان دینے پر توہین عدالت کا شوکاز نوٹس جاری کردیا گیا۔
رجسٹرارآفس ہائیکورٹ سے جاری شوکاز نوٹس عمران خان کی رہائش گاہ پر موصول ہوگیا ہے۔
شوکاز نوٹس میں کہا گیا ہے کہ عمران خان نے خاتون جج کے بارے میں توہین اوردھمکی آمیز تقریرکی، انھوں نےتقریراس وقت کی جب کیس اسلام آباد ہائیکورٹ میں زیرسماعت تھا۔
نوٹس میں کہنا تھا کہ عمران خان نے توہین اور دھمکی آمیز تقریر من پسند فیصلہ لینے کے لیے کی اور تقریر کے ذریعے انصاف کی راہ میں رکاوٹ ڈالنے کی کوشش کی۔
عدالت کی جانب سے شوکاز نوٹس میں کہا ہے کہ عمران خان نے خاتون جج کو دھمکی دے کرکریمنل اور جوڈیشل توہین کی،31 اگست کو پیش ہوکر بتائیں کیوں نا آپ کے خلاف توہین عدالت کاروائی کی جائے۔
یاد رہے 23 اگست کو اسلام آباد ہائیکورٹ نے عمران خان کے خلاف توہین عدالت کیس میں شوکاز نوٹس جاری کرنے کا حکم دیتے ہوئے سابق وزیراعظم عمران خان کو 31 اگست کو ذاتی حیثیت طلب کر لیا تھا
عدالت نے توہین عدالت کیس کیلئے تین سے زائد ججز پر مشتمل لارجر بینچ تشکیل دینے کا بھی فیصلہ دیا تھا،
