پیپلزپارٹی نے انتخابات ملتوی کرنے سے متعلق سینیٹ سے منظور ہونے والی قرارداد پر سینیٹر بہرہ مندتنگی کو پارٹی پالیسی کی خلاف ورزی پر شوکاز نوٹس جاری کر دیا۔
نوٹس میں کہا گیا کہ سینیٹ نے آج 8 فروری کے انتخابات سے متعلق قرارداد منظور کی ہے اجلاس میں سینیٹر بہرہ مندتنگی نے قرارداد کے حق میں تقریر بھی کی جو کہ پیپلزپارٹی کی پالیسی کے برخلاف ہے۔
نوٹس کے مطابق پیپلزپارٹی انتخابات بروقت چاہتی ہے اور یہی پالیسی ہے لہذا پارٹی پالیسی کی خلاف ورزی پر جواب دیا جائے۔
پیپلزپارٹی نے بہرہ مندتنگی سے ایک ہفتےمیں جواب طلب کرلیا ہے۔
سینیٹ میں 8 فروری کے عام انتخابات معطل کرنے کی قرارداد کثرت رائے سے منظور
قبل ازیں پی پی رہنما شیری رحمان نے میڈیا سے گفتگو کرتے ہوئے کہا کہ الیکشن میں تاخیر کے لیے 14 سینیٹرز کی موجودگی میں قرارداد پیش کی گئی، بلاول بھٹو نے واضح کیا ہم کسی صورت الیکشن میں تاخیر نہیں چاہتے، پیپلزپارٹی نے اس قرارداد کو سپورٹ نہیں کیا، اس پر ہمارے دستخط بھی نہیں ہیں۔
انہوں نے کہا کہ بہرہ مند تنگی نے کہا میں نے قرارداد کی مخالفت کی اگر ان کی مخالفت واضح نہیں تھی تو ہونی چاہیے تھی، سینیٹ کی ویڈیو دیکھ کر بہر مند تنگی سے وضاحت لیں گے۔
شیری رحمان نے کہا کہ ہمارا واضح موقف ہے الیکشن کروانے کے لیے سب سے آگے رہے ہیں، الیکشن وقت پر ہوں، بے یقینی نہیں ہونی چاہیے۔
